நீலகிரி மாவட்டம் கோத்தகிரி அருகே மாமரம் பகுதியில் உள்ள தேயிலை தோட்ட குடியிருப்பில் குடும்பத்துடன் தங்கியிருந்து வேலை செய்து வந்த ஜெகதீஷ் குர்ரே என்பவர், தனது மனைவியை கொலை செய்த சம்பவம் பரபரப்பை ஏற்படுத்தியுள்ளது.

சத்தீஸ்கர் மாநிலத்தைச் சேர்ந்த ஜெகதீஷ் குர்ரே மற்றும் அவரது மனைவி சிமாதேவி (வயது 35) ஆகியோர், கடந்த 1½ மாதமாக கோத்தகிரி அருகே உள்ள தனியார் தேயிலை தோட்டத்தில் பணியாற்றி வந்தனர். இவர்களுக்கு 2 மகள்கள் மற்றும் 1 மகன் உள்ளனர்.

இந்நிலையில், சிமாதேவி 2 நாட்களுக்கு முன்பு திடீரென காணாமல் போனதைத் தொடர்ந்து பல இடங்களில் தேடியும் பலன் இல்லாததால், ஜெகதீஷ் குர்ரே கோத்தகிரி காவல் நிலையத்தில் புகார் அளித்தார். போலீசார் வழக்குப்பதிவு செய்து விசாரணை நடத்தி வந்தனர்.

இதற்கிடையே, குடியிருப்புக்கு அருகில் பெண்ணொருவரின் சடலம் காணப்படுவதற்கான தகவலின்பேரில் போலீசார் சம்பவ இடத்துக்கு விரைந்தனர். அப்போது நடத்திய விசாரணையில் கொலை செய்யப்பட்டது சீமாதேவி என்பது தெரியவந்தது. பின்னர் சடலத்தை கைப்பற்றி பிரேத பரிசோதனைக்காக கோத்தகிரி அரசு மருத்துவமனைக்கு அனுப்பினர்.

பிரேத பரிசோதனையில், சிமாதேவி கழுத்தை துணியால் இறுக்கி கொல்லப்பட்டதாக தெரியவந்தது. இதையடுத்து போலீசார் தீவிர விசாரணை நடத்தினர். விசாரணையில், ஜெகதீஷ் குர்ரேக்கு மது குடிக்கும் பழக்கம் இருந்தது, மேலும் சிமாதேவி எப்போதும் செல்போனில் ‘இன்ஸ்டாகிராம்’ செயலியை பயன்படுத்தி வந்தது காரணமாக கணவன்-மனைவிக்குள் அடிக்கடி தகராறு ஏற்பட்டு வந்தது என தெரியவந்தது.

கடந்த 27-ம் தேதி இரவு, இன்ஸ்டாகிராம் பயன்படுத்த வேண்டாம் என தன் மனைவியுடன் அவர் கூறியுள்ளார். இதில்  கோபமடைந்த ஜெகதீஷ் குர்ரே, மனைவியின் துப்பட்டாவால் கழுத்தை இறுக்கி கொலை செய்துள்ளார். பின்னர், அவரது உடலை வீட்டின் பின்புறம் உள்ள இடத்தில் வீசி,  துப்பட்டாவால் மூடி வைத்துள்ளார். இதையடுத்து, எதுவும் நடக்காதது போல் வீடு திரும்பி தூங்கியுள்ளதாகவும் விசாரணையில் தெரிவிக்கப்பட்டுள்ளது.

போலீசாரின் கடுமையான விசாரணையின்போது, குற்றத்தை ஜெகதீஷ் குர்ரே ஒப்புக்கொண்டார். இதையடுத்து அவர் கைது செய்யப்பட்டுள்ளார். மேலும் இந்த சம்பவம், அந்த  பகுதிக்குள் பரபரப்பை ஏற்படுத்தியுள்ளது.