ராஜஸ்தான் மாநிலம் ஜின்ஜின்னு பகுதியில் அங்கன்வாடி மேற்பார்வையாளராக பணியாற்றி வந்த முகேஷ் குமாரி (37), சமீபத்தில் கணவரை விவாகரத்து செய்து தனியாக வாழ்ந்து வந்துள்ளார். இந்த நிலையில் பர்மா நகரைச் சேர்ந்த ஆசிரியர் மனாராமுடன் ஃபேஸ்புக் மூலம் நட்பாகி, அந்த நட்பு காதலாக மாறியது. இருவரும் தொலைபேசி வழியாக பேசியுள்ளனர்.

அதன் பின் இருவரும் தனிமையில் உல்லாசமாக இருந்துள்ளனர். அப்போது மனாராமிடம் தன்னை திருமணம் செய்து கொள்ளுமாறு முகேஷ் குமாரி வலியுறுத்தியுள்ளார். ஆனால் கடந்த ஒரு வருடமாக திருமணத்தைத் தவிர்த்து வந்த மனாராமிடம் முகேஷ் குமாரி தொடர்ச்சியாக திருமணத்துக்காக வற்புறுத்தியதால், மனாராம் அதில் விருப்பமின்றி இருந்துள்ளார்.

இதனையடுத்து, முகேஷ் குமாரி திடீரென தன் காரில் சுமார் 600 கிமீ தொலைவில் உள்ள காதலன் வீட்டுக்குச் சென்று, அவருடைய குடும்பத்தினரிடம் இருவருக்கும் உள்ள உறவை தெரிவித்துள்ளார். இதனால் ஆத்திரமடைந்த மனாராம், முகேஷ் குமாரியை காரில் புறநகர் பகுதிக்கு அழைத்துச் சென்று, காரில் இருந்த இரும்புக்கம்பியால் அவரது தலையில் பலமுறை அடித்து கொலை செய்துள்ளார்.

இந்த கொடூர சம்பவத்துக்குப் பிறகு, முகேஷ் குமாரியின் உடலை அருகிலுள்ள முள்புதரில் வீசி விட்டு தப்பிச்சென்ற மனாராமை, அந்த வழியாக சென்ற பொதுமக்கள் போலீசாருக்கு தகவல் வழங்கியதுடன், அருகிலுள்ள கண்காணிப்பு கேமரா காட்சிகள் மூலம் போலீசார் கண்டுபிடித்து கைது செய்துள்ளனர்.

தற்போது அவர் போலீஸ் காவலில் இருந்து நீதிமன்ற உத்தரவின் பேரில் சிறையில் அடைக்கப்பட்டுள்ளார். இந்த சம்பவம் மக்களிடையே பெரும் சோகத்தையும், சமூக ஊடகங்களில் காதல் உறவுகளில் நம்பிக்கையின் ஆபத்தையும் எடுத்துரைக்கும் விதமாக அமைந்துள்ளது.