சென்னை ஐஐடியில் படித்துச் சாதனை படைக்க வேண்டும் என்ற தனது நீண்ட நாள் கனவை, கடுமையான உடல் சவால்களையும் தாண்டி நனவாக்கியுள்ளார் 17 வயது இளம் மாணவர் ஜே.சந்தோஷ் . பிறவியிலேயே சுமார் தொண்ணூறு சதவீத முதுகுத்தண்டு தசை பாதிப்பு மற்றும் செரிப்ரல் பால்சி போன்ற உடல் உபாதைகளுடன் போராடி வரும் இவர், எளிய பின்னணியைக் கொண்ட ஒரு ஆட்டோ ஓட்டுநரின் மகனாவார். கடந்த காலத்தில் பள்ளியின் மூலமாக ஐஐடிக்குச் செல்ல முடியாத சூழல் இருந்தபோதிலும், தற்போது தனது அசாத்திய முயற்சியால் அதே கல்வி நிறுவனத்தில் காலடி எடுத்து வைத்துள்ளார்.

முதல் முயற்சியில் தகுதித் தேர்வில் சிறிய சறுக்கல்களைச் சந்தித்தாலும், சற்றும் தளராமல் இரண்டாவது முறையாக முழு மூச்சுடன் முயன்று தேர்வில் வெற்றியும் பெற்றுள்ளார்.  ஐஐடி மெட்ராஸ் வழங்கும் நான்கு ஆண்டு கால பிஎஸ் டேட்டா சயின்ஸ் மற்றும் அப்ளிகேஷன் படிப்பை வீட்டில் இருந்தபடியே பயிலும் வகையில் இவர் தேர்வு செய்துள்ளார். வரவிருக்கும் செப்டம்பர் மாதத்தின் மூன்றாவது வாரத்தில் தனது உயர்கல்விப் பயணத்தைத் தொடங்கத் தயாராகியுள்ள இவரின் லட்சியம் எதிர்காலத்தில் பெரிய அளவில் ஐடி துறையில் சாதிப்பதே ஆகும்.

சந்தோஷின் இத்தகைய உத்வேகமான முயற்சிக்கு ‘டிஎன் வாலன்டியர்ஸ்’ எனும் தன்னார்வ அமைப்பு பக்கபலமாக நின்று உதவிகளை முன்னெடுத்துள்ளது. இந்த அமைப்பின் மூலமாகவே தமக்கு ஐஐடி படிப்பு குறித்த விழிப்புணர்வு கிடைத்ததாகக் குறிப்பிட்ட சந்தோஷுக்கு அத்தன்னார்வ அமைப்பின் நிறுவனர் ஹரிகிருஷ்ணன் அவர்கள் முதல் ஆண்டிற்கான முழு கல்விக் கட்டணத்தையும் ஏற்பதாக உறுதியளித்துள்ளார். மேலும் மாணவருக்குத் தேவையான நேரடிப் பயிற்சி வகுப்புகள் மற்றும் நவீன செயற்கை நுண்ணறிவு (AI) சார்ந்த சிறப்புக் பயிற்சிகளையும் வழங்குவதாகவும் அந்த அமைப்பு அறிவித்துள்ளது.