கடந்த 2020-ம் ஆண்டு கொரோனா ஊரடங்கின் போது, சாத்தான்குளத்தைச் சேர்ந்த தந்தை ஜெயராஜ் மற்றும் மகன் பெனிக்ஸ் ஆகியோர் போலீஸ் விசாரணையின் போது கொடூரமாகத் தாக்கப்பட்டு உயிரிழந்த சம்பவம் ஒட்டுமொத்த தமிழகத்தையும் அதிர வைத்தது. இந்தச் சிபிஐ (CBI) வழக்கில் கைதான இன்ஸ்பெக்டர் ஸ்ரீதர் உள்ளிட்ட 10 போலீஸ்காரர்களில், ஒருவர் ஏற்கனவே உயிரிழந்த நிலையில், மீதமுள்ள 9 பேரும் கடந்த 5 ஆண்டுகளாக ஜாமீன் கிடைக்காமல் சிறையில் உள்ளனர்.

​இந்த வழக்கின் முக்கிய மைல்கல்லாக, கடந்த 23-ம் தேதி 9 போலீஸ்காரர்களும் ‘குற்றவாளிகள்’ என மதுரை நீதிமன்றம் அறிவித்தது. இவர்களுக்கான தண்டனை விபரங்கள் வரும் மார்ச் 30-ம் தேதி அறிவிக்கப்பட உள்ள நிலையில், அதற்கு முன்னதாக இவர்களின் உடல்நிலை மற்றும் மனநிலை குறித்து அறிக்கை தாக்கல் செய்ய நீதிபதி உத்தரவிட்டுள்ளார்.

இதற்காக மதுரை அரசு மருத்துவமனையில் தனி அறை ஒதுக்கப்பட்டு, பலத்த பாதுகாப்புடன் இன்று மற்றும் நாளை அந்த 9 போலீஸ்காரர்களுக்கும் தீவிர மருத்துவப் பரிசோதனைகள் நடைபெறுகின்றன. 5 ஆண்டு சிறைவாசத்திற்குப் பிறகு இந்த வழக்கின் இறுதித் தீர்ப்பு என்னவாக இருக்கும் என்ற எதிர்பார்ப்பு தூத்துக்குடி மற்றும் மதுரை மக்களிடையே தற்போதே எகிறியுள்ளது.