உத்தரப் பிரதேச மாநிலம் லக்னோவில் உள்ள புகழ்பெற்ற கிங் ஜார்ஜ் மருத்துவக் கல்லூரியின் அதிதீவிர விபத்து சிகிச்சை மையத்தில், மருத்துவர்கள் தங்களது அசாத்திய திறமையால் 23 வயது இளம் தொழிலாளி ஒருவரின் உயிரை மயிரிலை இடைவெளியில் மீட்டுள்ளனர். அந்த வாலிபரின் உடலை நான்கு பெரிய இரும்புக் கம்பிகள் அடியோடு துளைத்து, உடலின் மறுபக்கம் வரை ஆழமாகப் பாய்ந்திருந்த நிலையில், சுமார் 8 மணி நேரம் 30 நிமிடங்கள் தொடர்ச்சியாக நடத்தப்பட்ட அதிசிக்கலான அறுவை சிகிச்சைக்குப் பின் அக்கம்பிகள் வெற்றிகரமாக அகற்றப்பட்டுள்ளன. தற்போது அந்த வாலிபர் தீவிர சிகிச்சைப் பிரிவில் அனுமதிக்கப்பட்டு, அவரது உடல்நிலை சீராக உள்ளதாக மருத்துவர்கள் தெரிவித்துள்ளனர்.

நரையா கிராமத்தைச் சேர்ந்த உமேஷ் என்ற 23 வயது வாலிபர், கடந்த ஜூலை 13-ஆம் தேதி காலை லக்னோவின் பாட்ஷா நகரில் உள்ள ஒரு கட்டுமான தளத்தில் வேலை செய்து கொண்டிருந்தார். அப்போது எதிர்பாராதவிதமாகக் கட்டுப்பாட்டை இழந்த அவர், பல அடி உயரத்திலிருந்து கீழே நின்றுகொண்டிருந்த கூர்மையான இரும்புக் கம்பிகளின் மீது பயங்கரமாக விழுந்தார். இந்த கொடூர விபத்தில், நான்கு இரும்புக் கம்பிகள் அவரது உடலின் இடது பக்கமாக நுழைந்து, வயிறு மற்றும் நெஞ்சுப் பகுதியைத் கிழித்துக் கொண்டு வெளியே வந்தன. இதில் மூன்று கம்பிகள் அவரது தோள்பட்டை மற்றும் கழுத்து வரை பாய்ந்து உடலைத் துளைத்து நின்றன.

விபத்து நடந்த இடத்தில் இருந்த சக தொழிலாளர்கள் பதற்றமடையாமல், கம்பிகளை உமேஷின் உடலிலிருந்து பலவந்தமாகப் பிடுங்க முயலாமல், மிகச் சாதுரியமாகக் கம்பிகளின் வெளிப்புறப் பகுதியை மட்டும் வெட்டி எடுத்துவிட்டு, அப்படியே அவரை ஆம்புலன்ஸ் மூலம்  மருத்துவமனைக்குக் கொண்டு சேர்த்தனர். மருத்துவமனைக்கு வந்த போது உமேஷின் இரத்த அழுத்தம் மிகக் ஆபத்தான அளவிற்குச் சரிந்ததுடன், சிறுநீரிலும் இரத்தம் கலந்து வந்தது. பரிசோதனையில், அந்த இரும்புக் கம்பிகள் அவரது சிறுநீர்ப்பை, சிறுகுடல், இரைப்பை, மண்ணீரல், உதரவிதானம், இடது நுரையீரல் மற்றும் சில முக்கிய இரத்த நாளங்களை மிகக் கொடூரமாகச் சேதப்படுத்தியது தெரியவந்தது. நுரையீரலில் காற்று புகுந்ததால் அவரால் சுவாசிக்கவும் முடியாமல் தவித்துள்ளார்.

பேராசிரியர் டாக்டர் சமீர் மிஸ்ராவின் வழிகாட்டுதலின் கீழ், டாக்டர் நரேந்திர குமார் மற்றும் 16 பேர் அடங்கிய மருத்துவக் குழுவினர் உடனடியாகச் செயல்பட்டு உமேஷை அறுவை சிகிச்சை அரங்கிற்கு அழைத்துச் சென்றனர். ஒவ்வொரு கம்பியாக மிகக் கவனமாக உடலிலிருந்து அகற்றிய மருத்துவர்கள், சேதமடைந்த அனைத்து உள் உறுப்புகளையும் தையல் போட்டுச் சீரமைத்தனர். இந்த நீண்ட சிகிச்சையின் போது நோயாளிக்கு 3 யூனிட் சிவப்பணுக்கள் மற்றும் 4 யூனிட் பிளாஸ்மா இரத்தம் செலுத்தப்பட்டது. இச்சாதனையைப் பாராட்டிய பல்கலைக்கழகத் துணைவேந்தர் பேராசிரியர் சோனியா நித்யானந்த், இதுபோன்ற விபத்துகளின் போது உடலில் குத்திய கம்பிகளை விபத்து இடத்திலேயே பிடுங்கக் கூடாது என்றும், அது அதிக இரத்தப்போக்கை ஏற்படுத்தி உயிரையே பறித்துவிடும் என்பதால், கம்பிகளுடன் அப்படியே மருத்துவமனைக்குக் கொண்டு வருவதே புத்திசாலித்தனம் என்றும் பொதுமக்களுக்கு விழிப்புணர்வு அறிவுரை வழங்கியுள்ளார்.