தமிழக அரசியல் வரலாற்றையே தலைகீழாக மாற்றியமைக்கும் வகையில், முதலமைச்சர் விஜய் தலைமையிலான தவெக அரசில் கிட்டத்தட்ட 59 ஆண்டுகளுக்குப் பிறகு காங்கிரஸ் கட்சிக்கு மந்திரி பதவி கிடைத்துள்ள விவகாரம் தேசிய அளவில் பெரும் உற்றுநோக்கலை ஏற்படுத்தியுள்ளது.

இன்று (மே 21) நடந்த அதிரடி அமைச்சரவை விரிவாக்கத்தில் காங்கிரஸ் கட்சியைச் சேர்ந்த விஸ்வநாதனுக்கு உயர்கல்வித்துறையும், ராஜேஷ் குமாருக்கு சுற்றுலாத்துறையும் என பவர்ஃபுல்லான இலாகாக்கள் ஒதுக்கப்பட்டுள்ளது குறித்து காங்கிரஸ் எம்பி மாணிக்கம் தாகூர் நெகிழ்ச்சியுடனும், ஆக்ரோஷமாகவும் தனது கருத்துக்களைப் பகிர்ந்துள்ளார்.

“இத்தனை காலம் சட்டமன்றத்தில் மக்களுக்காகக் குரல் எழுப்பிய காங்கிரஸ், இப்போது முதலமைச்சர் விஜய்யின் பெரிய மனதால் அந்தப் பிரச்சினைகளைத் தீர்க்கும் அதிகாரமிக்க இடத்திற்கே சென்றுள்ளது” என அவர் பூரித்துப் போயுள்ளார்.

மேலும், “இத்தனை காலமும் திமுக, அதிமுக ஆகிய இரண்டு கட்சிகளுமே தங்களது கூட்டணிகளில் காங்கிரஸை வைத்திருந்ததே தவிர, யாருமே ஆட்சி அதிகாரத்தைப் பகிர்ந்து தரவில்லை; ஆனால் அந்தப் பழைய அராஜக மாடலைத் தற்போது முதல்வர்  விஜய் உடைத்தெறிந்து புதிய சாதனை படைத்துள்ளார்” என எடப்பாடி மற்றும் ஸ்டாலின் டீமுக்கு நேரடியாகவே ‘செக்’ வைத்துள்ளார் மாணிக்கம் தாகூர்.

அதோடு நிறுத்தாமல், தவெக அமைச்சரவையில் விசிக மற்றும் முஸ்லிம் லீக் கட்சிகளுக்கும் அதிகாரம் பகிரப்பட வேண்டும் என்பதுதான் உண்மையான ஜனநாயகத்தின் அடிப்படை உரிமை என்றும் அவர் அழுத்தமாக வலியுறுத்தியிருப்பது கோட்டை வட்டாரத்தில் அனல் பறக்கும் மெகா விவாதத்தைக் கிளப்பியுள்ளது.