விமானப் பயணம் உலகின் பாதுகாப்பான ஒன்றாகக் கருதப்பட்டாலும், வரலாற்றில் சில சம்பவங்கள் நெஞ்சை உலுக்கக் கூடியவையாக அமைந்துவிடுகின்றன. கடந்த 1988 ஆம் ஆண்டு ஏப்ரல் 28 அன்று, அமெரிக்காவின் ஹவாய் தீவில் அலோஹா ஏர்லைன்ஸுக்குச் சொந்தமான போயிங் 737 ரக விமானம் ஒன்று, 89 பயணிகள் மற்றும் 6 ஊழியர்களுடன் ஹிலோவில் இருந்து ஹொனொலுலு நோக்கிப் பறந்து கொண்டிருந்தது. விமானம் சுமார் 24 ஆயிரம் அடி உயரத்தில் பறந்தபோது, எதிர்பாராதவிதமாக விமானத்தின் மேற்கூரைப் பகுதி பயங்கர சத்தத்துடன் வெடித்து, காற்றில் பறந்து காணாமல் போனது.

ஹாலிவுட் படக் காட்சி போல, கண்ணிமைக்கும் நேரத்தில் பயணிகள் தலைக்கு மேலே இருந்த கூரை மறைந்து, வெறும் வெட்டவெளி வானம் மட்டுமே தெரிந்தது. முறையான பராமரிப்பு இல்லாததால் விமானத்தின் உடல் பகுதி பலவீனமடைந்ததே இந்த விபத்திற்குக் காரணம் எனப் பின்னர் தெரியவந்தது.

தலைக்கு மேலே கூரையின்றி, சுழன்றடித்த பலத்த காற்று மற்றும் பயங்கர அதிர்வுகளுக்கு நடுவே, மரண பயத்தில் பயணிகள் அலறினர். இருப்பினும், விமானிகள் ராபர்ட் ஷோர்ன்தெய்மர் மற்றும் மேட்லின் டாம்கின்ஸ் ஆகியோர் இக்கட்டான அந்தச் சூழலிலும் தங்களின் அசாத்திய தைரியத்தாலும், அனுபவத்தாலும் விமானத்தைக் கட்டுப்பாட்டுக்குள் கொண்டு வந்து, பத்திரமாக அவசரத் தரையிறக்கம் செய்து பல உயிர்களைக் காப்பாற்றினர்.

இந்த விபத்தில் துரதிர்ஷ்டவசமாக கிளாரபெல் லான்சிங் என்ற 58 வயது பணிப்பெண் ஒருவர் காற்றில் தூக்கி வீசப்பட்டு உயிரிழந்தார்; அவரது உடல் இன்றுவரை கண்டறியப்படவில்லை. மேலும், 65 பயணிகள் படுகாயமடைந்தனர். ஒருவேளை பயணிகள் அனைவரும் தங்களின் இருக்கை வாரை சரியாக அணியாமல் இருந்திருந்தால், பலி எண்ணிக்கை இன்னும் அதிகமாகி இருக்கும் எனப் பாதுகாப்பு நிபுணர்கள் தெரிவித்தனர். மேலும்  விமானப் போக்குவரத்து வரலாற்றில், முறையான பாதுகாப்பு சோதனைகளின் அவசியத்தை உலகிற்கு உணர்த்திய ஒரு பயங்கர சம்பவமாக இது இன்றும் பார்க்கப்படுகிறது.