ஆந்திர மாநிலம் விஜயநகரம் மாவட்டம்,  கோடகந்திரேடு கிராமத்தில் நெஞ்சை உலுக்கும் கோரச் சம்பவம் ஒன்று நடந்துள்ளது. காதலும் திருமணத் தடையின்மையும் இரண்டு இளம் உயிர்களைப் பறித்துள்ள சம்பவம் அந்தப் கிராமத்தையே சோகத்தில் ஆழ்த்தியுள்ளது.

கோடகந்திரேடு கிராமத்தைச் சேர்ந்த வோனிவி தேவகி நந்தன் என்பவரும், அதே ஊரைச் சேர்ந்த ஒரு இளம்பெண்ணும் தீவிரமாகக் காதலித்து வந்துள்ளனர். நந்தன் தனது வீட்டில் காதலைப் பற்றிச் சொல்ல, இரு குடும்பத்தினரும் சம்மதித்துத் திருமணத்தைப் பற்றிப் பேசத் தொடங்கினர்.

ஆனால், பெண்ணின் வயது குறைவாக இருந்ததால் நந்தனின் குடும்பத்தினர் திருமணத்திற்குச் சில காலம் அவகாசம் கேட்டுள்ளனர். இதனால் இரு குடும்பங்களுக்கும் இடையே சிறு மனகசப்பு  ஏற்பட்டு, அது காவல் நிலையம் வரை சென்றது. பின்னர் கிராமத்துப் பெரியவர்கள் தலையிட்டுப் பேசி அந்தப் பிரச்சினையைச் சமாதானம் செய்து வைத்தனர்.

இதற்கிடையில், கடந்த ஞாயிற்றுக்கிழமை இரவு திடீரெனப் பெண்ணின் உறவினர்கள் நந்தனின் வீட்டிற்குச் சென்று, உடனடியாகத் திருமணத்தை முடித்தாக வேண்டும் என்று அழுத்தம் தந்துள்ளனர். மீண்டும் குடும்பத்தினர் அவகாசம் கேட்டதால் இரு தரப்புக்கும் இடையே கடுமையான வாக்குவாதம் ஏற்பட்டுள்ளது.

இந்தச் சண்டையால் மனமுடைந்த நந்தன், நள்ளிரவில் அனைவரும் தூங்கிய பிறகு வீட்டைவிட்டு வெளியேறி, அருகில் தான் கட்டிக்கொண்டிருந்த புதிய வீட்டிற்குச் சென்று தூக்கிட்டுத் தற்கொலை செய்துகொண்டார். காலையில் மகனைத் தேடிச் சென்று பார்த்த பெற்றோர், அவனது உடலைக் கண்டு கதறி அழுதனர்.

தன் காதலன் இறந்துவிட்டான் என்ற செய்தி கேட்டதும் அந்த இளம்பெண்ணால் அந்த அதிர்ச்சியைத் தாங்கவே முடியவில்லை. காதலனின் பிரிவைத் தாங்க முடியாத அவரும், அடுத்த நாள் விடியற்காலையில் அதேபோல் தூக்கிட்டுத் தற்கொலை செய்துகொண்டார்.

வெறும் 24 மணி நேரத்திற்குள் அடுத்தடுத்து நிகழ்ந்த இந்தக் காதல் ஜோடியின் மரணம் கிராம மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது. குர்லா காவல்துறையினர் இருவரின் உடல்களையும் கைப்பற்றிப் பிரேதப் பரிசோதனைக்கு அனுப்பி வைத்துவிட்டு, தீவிர விசாரணை நடத்தி வருகின்றனர்.