தமிழ்நாடு பிரீமியர் லீக் டி20 கிரிக்கெட் தொடரில் நடைபெற்ற பரபரப்பான ஆட்டத்தில், நெல்லை ராயல் கிங்ஸ் அணியை 8 விக்கெட் வித்தியாசத்தில் ஐட்ரீம் திருப்பூர் தமிழன்ஸ் அணி அபாரமாக வீழ்த்தியது. இந்தப் போட்டியில் டாஸ் வென்ற திருப்பூர் அணி பந்துவீச்சைத் தேர்வு செய்தது.

முதலில் பேட் செய்த நெல்லை அணி, நிர்ணயிக்கப்பட்ட 20 ஓவர்களில் 8 விக்கெட் இழப்புக்கு 206 ரன்கள் என்ற பலமான ஸ்கோரை எட்டியது. அந்த அணியில் முகிலேஷ் 46 ரன்களும், சந்தோஷ் குமார் 43 ரன்களும், அஜிதேஷ் 35 ரன்களும் எடுத்தனர். திருப்பூர் தரப்பில் சிலம்பரசன் 4 விக்கெட்டுகளையும், சாய் கிஷோர் 2 விக்கெட்டுகளையும் கைப்பற்றினர்.

இதையடுத்து, 207 ரன்கள் என்ற கடினமான இலக்கை நோக்கித் களமிறங்கிய திருப்பூர் தமிழன்ஸ் அணியின் தொடக்கம் மிகச்சிறப்பாக அமைந்தது. தொடக்க வீரர் அமித் சத்விக் நெல்லை பந்துவீச்சாளர்களை நாலாபுறமும் சிதறடித்து வெறும் 31 பந்துகளில் 76 ரன்கள் குவித்து அவுட்டானார்.

அவருக்குப் பலமாகத் துணை நின்ற மற்றொரு தொடக்க வீரர் துஷார் ரஹேஜா பொறுப்புடன் ஆடி கடைசி வரை ஆட்டமிழக்காமல் 90 ரன்கள் விளாசினார். சதத்தை நெருங்கிய நிலையிலும் அணியின் வெற்றியை முதன்மையாகக் கொண்டு அவர் அதிரடியைத் தொடர்ந்தார்.

மறுபுறம் கேப்டன் சாய் கிஷோரும் தன் பங்கிற்குச் சிறப்பான ஆட்டத்தை வெளிப்படுத்தி 23 பந்துகளில் 32 ரன்கள் சேர்த்து ஆட்டமிழக்காமல் களத்தில் நின்றார். இந்த அதிரடியான மற்றும் பொறுப்பான பேட்டிங் கூட்டணியால் திருப்பூர் அணியின் ரன் ரேட் அதிகமாக உயர்ந்தது.

இதனால் நெல்லை அணியின் பந்துவீச்சால் திருப்பூர் வீரர்களின் ஆட்டத்தை எந்த இடத்திலும் கட்டுப்படுத்த முடியவில்லை.‌‌ இறுதியில், திருப்பூர் தமிழன்ஸ் அணி வெறும் 18.1 ஓவர்களிலேயே 2 விக்கெட்டுகளை மட்டுமே இழந்து 207 ரன்கள் எடுத்து எளிதில் வெற்றி இலக்கை எட்டியது.

“>

 

200 ரன்களுக்கு மேல் குவித்தும் நெல்லை அணியால் வெற்றியைப் பாதுகாக்க முடியவில்லை. டி20 கிரிக்கெட்டில் இவ்வளவு பெரிய இலக்கையும் அசால்ட்டாக சேஸ் செய்து திருப்பூர் அணி பதிவு செய்த இந்த வரலாற்று வெற்றி கிரிக்கெட் ரசிகர்களை வெகுவாகக் கவர்ந்துள்ளது.