இங்கிலாந்துக்கு எதிரான மூன்றாவது டி20 போட்டியில் இந்திய கிரிக்கெட் அணி தனது வரலாற்றிலேயே மிக மோசமான தோல்வியைச் சந்தித்து, நாட்டிங்ஹாமின் ‘ட்ரெண்ட் பிரிட்ஜ்’ மைதானத்தில் ஒரு கசப்பான நினைவைப் பதிவு செய்துள்ளது. இப்போட்டியில் இங்கிலாந்து நிர்ணயித்த 201 ரன்கள் என்ற இலக்கை துரத்திய இந்திய அணி, வெறும் 76 ரன்களுக்கு அனைத்து விக்கெட்டுகளையும் இழந்து, 125 ரன்கள் என்ற டி20 வரலாற்றின் மிகப்பெரிய ரன் வித்தியாசத்தில் தோல்வியடைந்தது. இந்த மோசமான தோல்வியின் மூலம், 5 போட்டிகள் கொண்ட டி20 தொடரில் இங்கிலாந்து அணி 2-0 என வீழ்த்த முடியாத முன்னிலையைப் பெற்றுள்ளது.

அதே வேளையில், இந்திய கிரிக்கெட் வரலாற்றிலேயே முதன்முறையாக சர்வதேச டி20 போட்டிகளில் தொடர்ந்து 5 போட்டிகளில் ஒரு வெற்றியைக்கூட பெற முடியாமல் இந்திய அணி தவித்து வருகிறது. இந்த மோசமான தொடர் அயர்லாந்து சுற்றுப்பயணத்தில் இருந்து தொடங்கியது; அங்கு 2 போட்டிகளில் தோற்ற இந்தியா, இங்கிலாந்துக்கு எதிரான முதல் போட்டி மழையால் கைவிடப்பட்ட பின், அடுத்த இரண்டு போட்டிகளிலும் படுதோல்வி அடைந்துள்ளது.

இந்த வரலாற்றுச் சரிவுக்குப் பின் பேசிய இந்திய அணியின் கேப்டன் ஷ்ரேயாஸ் ஐயர், அணியின் செயல்பாடு குறித்து தனது கடும் அதிருப்தியை வெளிப்படுத்தியுள்ளார். அவர் பேசுகையில், “இன்றைய எங்கள் ஆட்டம் மிகவும் ஏமாற்றமளிக்கிறது, இதைவிட பொருத்தமான வார்த்தை என்னிடம் இல்லை. இவ்வளவு பெரிய ரன் வித்தியாசத்தில் தோற்பதை எந்த சூழ்நிலையிலும் ஏற்றுக்கொள்ள முடியாது. முதலில் இந்தத் தோல்வியை ஒப்புக்கொண்டு, எங்கள் தவறுகளைக் கண்டறிந்து மீண்டும் புதிய திட்டங்களுடன் களமிறங்க வேண்டும். இது 200 ரன்கள் எடுக்கக்கூடிய பிட்ச் கிடையாது. பவர்-பிளேயிலேயே 4 விக்கெட்டுகளை இழந்ததால் எங்களது ஒட்டுமொத்த ஆட்டத்தின் போக்கும்  கெட்டுப்போனது. நீங்கள் எவ்வளவுதான் உத்திகளை வகுத்தாலும், மைதானத்தில் இறங்கியதும் சூழ்நிலைக்கு ஏற்ப உங்களை மாற்றிக்கொள்ள வேண்டும்.

 

சரியான லென்த்தில் பந்துவீசுவது முக்கியம், ஆனால் நாங்கள் அதைச் செய்யத் தவறிவிட்டோம். ரன்களை துரத்தும்போது ஒரு குறிப்பிட்ட பேட்டர்ன் தேவை, ஆனால் எங்கள் திட்டங்கள் எதுவும் மைதானத்தில் ஒர்க்-அவுட் ஆகவில்லை. நாங்கள் மிகவும் மோசமான கிரிக்கெட்டை விளையாடினோம், ஆனால் இந்தத் தோல்வியில் இருந்து கற்றுக்கொள்ள நிறைய இருக்கிறது. ஒவ்வொரு வீரரும் அணிக்கு எப்படி பங்களிக்க வேண்டும் என்பதை சிந்தித்து, பொறுப்பேற்று விளையாட வேண்டும்” என்று தெரிவித்துள்ளார். இரு அணிகளுக்கும் இடையிலான 4-வது டி20 போட்டி வரும் ஜூலை 9, வியாழக்கிழமை அன்று நடைபெறவுள்ளது.