குழந்தை பிறந்தவுடன் அதனை பதிவு செய்து பிறப்புச் சான்றிதழ் பெறுவது என்பது மிகவும் முக்கியமானது. ஆனால், பல காரணங்களால் இதை தாமதப்படுத்தி வருபவர்கள் இப்போது கவனமாக இருக்க வேண்டும். ஏனெனில், குழந்தையின் பெயரை பதிவு செய்து பிறப்புச் சான்றிதழ் பெற கடைசி நாள் நெருங்கிவிட்டது.

தமிழ்நாடு அரசு, பிறப்பு பதிவுகளை மேம்படுத்தும் பொருட்டு, பல்வேறு நடவடிக்கைகளை எடுத்து வருகிறது. அதன் ஒரு பகுதியாக, குழந்தை பிறந்து 15 ஆண்டுகள் கடந்த பிறகும் பெயர் பதிவு செய்ய வசதி செய்து தந்தது. ஆனால், இந்த கால அவகாசம் 2024 டிசம்பர் 31ஆம் தேதியுடன் நிறைவடைய உள்ளது.

பிறப்புச் சான்றிதழ் என்பது குழந்தையின் முதல் அடையாளச் சான்று. இது குழந்தையின் உரிமைகளைப் பாதுகாக்கவும், எதிர்காலத்தில் பள்ளியில் சேர்க்கை, பாஸ்போர்ட், ஓட்டுநர் உரிமம் போன்றவற்றைப் பெறவும் அவசியமாகும்.

2024 டிசம்பர் 31ஆம் தேதிக்குள் பிறப்புச் சான்றிதழ் பெற தவறிவிட்டால், குழந்தையின் பெயரை பதிவு செய்யும் வாய்ப்பு இனி கிடைக்காது. எனவே, இது தொடர்பாக தாமதிக்காமல் உடனடியாக நடவடிக்கை எடுக்க வேண்டும்.

உங்கள் குழந்தைக்கு இன்னும் பிறப்புச் சான்றிதழ் கிடைக்கவில்லை என்றால், உடனடியாக உங்கள் ஊராட்சி அல்லது நகராட்சி அலுவலகத்தை அணுகி, தேவையான ஆவணங்களுடன் விண்ணப்பிக்கவும். இதற்கான கடைசி நாள் டிசம்பர் 31, 2024 என்பதை நினைவில் கொள்ளவும்.