தமிழகத்தில் சாலைகள் மற்றும் பாலங்கள் அமைப்பதற்காக மத்திய அரசு இதுவரை சுமார் ₹14 லட்சம் கோடி நிதி வழங்கியுள்ளதாகப் பாஜக மாநிலத் தலைவர் நயினார் நாகேந்திரன் அதிரடித் தகவலை வெளியிட்டுள்ளார். மத்திய அரசு தமிழகத்திற்கு எதையுமே வழங்கவில்லை என்று மாநில அரசு தொடர்ந்து பொய் கூறி வருவதாகக் குற்றம் சாட்டிய அவர், மத்திய அரசின் நிதியைப் பெற்றுக்கொண்டு மாநில அரசு அரசியல் செய்து வருவதாகச் சாடினார். சாலை உட்கட்டமைப்பு வசதிகளுக்காக ஒதுக்கப்பட்ட இந்த பிரம்மாண்ட நிதி குறித்துத் தமிழக அரசு உண்மையை மறைப்பதாக அவர் தெரிவித்தார்.

​மேலும், ரேஷன் கடைகளில் மத்திய அரசு இலவசமாக வழங்கும் பொருட்களுக்கு மாநில அரசு தனது ஸ்டிக்கரை ஒட்டி, அது தங்களது சொந்தத் திட்டம் போலக் காட்டி மக்களை ஏமாற்றி வருவதாக நயினார் நாகேந்திரன் பகிரங்கமாகக் குற்றம் சாட்டினார். “மத்திய அரசு செய்யும் உதவிகளைத் தங்களது சாதனையாகக் காட்டும் ஸ்டிக்கர் அரசியலைத் திமுக அரசு உடனடியாக நிறுத்திக்கொள்ள வேண்டும்” என்று அவர் எச்சரித்தார். நயினார் நாகேந்திரனின் இந்தப் பேச்சு தமிழக அரசியல் வட்டாரத்தில், குறிப்பாகத் திமுக – பாஜக இடையே பெரும் விவாதத்தைக் கிளப்பியுள்ளது.