உலகளவில் கச்சா எண்ணெய் மற்றும் இயற்கை எரிவாயு போக்குவரத்திற்கு மிக முக்கிய நீர்ச்சந்தியாக விளங்கும் ஹார்முஸ் பகுதியில், தங்களுக்குப் போட்டியான ‘எதிரி நாடுகளுக்கு’ மட்டுமே அனுமதி மறுக்கப்பட்டுள்ளதாக ஈரான் அதிரடியாக அறிவித்துள்ளது.

மேலும் அமெரிக்கா மற்றும் இஸ்ரேல் உடனான போர் பதற்றம் உச்சகட்டத்தை எட்டியுள்ள நிலையில், ஹார்முஸ் நீரிணை முழுமையாக மூடப்படவில்லை என்றும், ஈரானின் இறையாண்மைக்கு எதிராகச் செயல்படும் நாடுகளைத் தவிர மற்ற அனைத்து நாடுகளின் கப்பல்களும் தடையின்றிப் பயணிக்கலாம் என்றும் ஈரானிய புரட்சிகர காவல்படை மற்றும் ஈரானிய வெளியுறவுத்துறை அமைச்சகம் தெளிவுபடுத்தியுள்ளது.

இது குறிப்பாக, இந்தியா போன்ற நட்பு நாடுகளின் எரிசக்தி தேவைகளைக் கருத்தில் கொண்டு, அந்நாட்டுக் கப்பல்கள் பாதுகாப்பாகச் செல்ல ஈரான் சிறப்பு அனுமதியை வழங்கியுள்ளது. இந்த முடிவானது சர்வதேச சந்தையில் பெரும் தாக்கத்தை ஏற்படுத்தியுள்ளது. உலகின் 20 சதவீத கச்சா எண்ணெய் இந்தப் பாதை வழியாகவே கடக்க வேண்டிய சூழலில், அமெரிக்க மற்றும் மேற்கத்திய நாடுகளின் கப்பல்களுக்கு விதிக்கப்பட்டுள்ள தடையால் உலகளாவிய எரிசக்தி விநியோகச் சங்கிலியில் சிக்கல்கள் எழுந்துள்ளன.

இருப்பினும், “விருப்பமுள்ள நாடுகள் எங்களுடன் இணைந்து செயல்படலாம், ஆனால் ஆக்கிரமிப்பாளர்களுக்கும் அவர்களுக்குத் துணையாக இருப்பவர்களுக்கும் இந்தப் பாதையில் இடமில்லை” என ஈரான் திட்டவட்டமாகக் கூறியுள்ளது. இதற்கிடையில், இந்தப் பகுதியில் சுதந்திரமான கப்பல் போக்குவரத்தை உறுதி செய்ய அமெரிக்கா தனது கூட்டணி நாடுகளுடன் இணைந்து பாதுகாப்பு நடவடிக்கைகளைத் தீவிரப்படுத்தி வருவதால், பாரசீக வளைகுடாப் பகுதியில் தொடர்ந்து பதற்றமான சூழலே நிலவுகிறது.