மும்பை இந்தியன்ஸ் அணியின் புதிய கேப்டனாக ஹர்திக் பாண்டியா நியமிக்கப்பட்டுள்ளார். ரோஹித்தின் பங்களிப்பு அளவிட முடியாதது என்று கூறிய ஹர்திக் பாண்டியா தலைமை மாற்றத்திற்குப் பிறகு இன்றுவரை அவருடன் எந்த தொடர்பும் இல்லை என்பதையும் ஒப்புக்கொண்டார்.
வரும் வெள்ளிக்கிழமை (22ஆம் தேதி) முதல் 2024 ஐபிஎல் சென்னை – பெங்களூரு அணிகளுக்கு இடையேயான போட்டியுடன் தொடங்குகிறது. இந்நிலையில் மும்பை இந்தியன்ஸ் சீசனுக்கு முந்தைய செய்தியாளர் சந்திப்பு நேற்று நடைபெற்றது. அதில், மும்பை இந்தியன்ஸ் அணியின் தலைமை மாற்றம் உள்ளிட்ட கேள்விகளுக்கு ஹர்திக் பாண்டியா மற்றும் தலைமை பயிற்சியாளர் மார்க் பவுச்சர் விளக்கம் அளித்தனர்.
குஜராத் அணியில் இருந்து மீண்டும் மும்பை அணிக்கு வந்த ஹர்திக்பாண்டியாவுக்கு கேப்டன் பதவி வழங்கப்பட்டதால் மும்பை இந்தியன்ஸ் ரசிகர்களிடையே கோபத்தை தூண்டியது மற்றும் பலர் சமூக ஊடகங்களில் தங்கள் அதிருப்தியை வெளிப்படுத்தினர். அதன் பிறகு ஹர்திக் பாண்டியா இதுபற்றி எந்த கருத்தும் தெரிவிக்கவில்லை. நேற்று நடைபெற்ற செய்தியாளர் சந்திப்பில், இந்த மாற்றம் குறித்து அவரிடம் பல கேள்விகள் கேட்கப்பட்டன. ஹர்திக், புன்னகையுடன் பதிலளித்து, எங்கும் கருத்து வேறுபாடு இல்லை என்பதைக் காட்டினார்.
ரோஹித் ஷர்மாவும் இந்திய அணியின் கேப்டனாக இருக்கிறார், அவருடைய தலைமையில் நானும் இந்திய அணிக்காக விளையாடி இருக்கிறேன். அதனால் இப்போது ஐபிஎல்லில் அவருக்குப் பதிலாக நான் முன்னிலை வகித்தாலும் பெரிய வித்தியாசம் இருக்காது. ரோஹித் எப்போதும் உதவ தயாராக இருக்கிறார், என்றார் ஹர்திக்.
ரோஹித்துடன் நல்ல உறவு :
ரோஹித் ஷர்மா இதுவரை மும்பை இந்தியன்ஸுக்கு கொண்டு வந்ததை நான் தொடர விரும்புகிறேன், எனவே ரோஹித் உதவிக்கு இருப்பார். இந்த மாற்றம் நம்மில் யாருக்கும் கடினமாக இருக்காது. நாங்கள் கடந்த 10 ஆண்டுகளாக ஒன்றாக விளையாடி வருகிறோம், அதனால் நல்ல உறவுமுறை உள்ளது என்று ஹர்திக் தெரிவித்தார்.
ரசிகர்களின் உணர்வுகளுக்கு மதிப்பளிக்க வேண்டும் :
ரோஹித்துக்குப் பதிலாக மும்பை இந்தியன்ஸ் அணியின் கேப்டனாக நான் தேர்வு செய்யப்பட்டேன், இது சில மும்பை ரசிகர்களுக்குப் பிடிக்கவில்லை, அவர்களின் அதிருப்தி புரிகிறது. ஆனால் இந்த ரசிகர்களின் உணர்வுகளை நான் மதிக்கிறேன், அதே நேரத்தில் நாங்கள் விளையாட்டில் அதிக கவனம் செலுத்துகிறோம். எனக்கு எட்டக்கூடிய விஷயங்களைப் பற்றி அதிகம் யோசிக்கிறேன். என்னால் கட்டுப்படுத்த முடியாததைப் பற்றி சிந்திக்கவில்லை. இறுதியில் ஒவ்வொரு ரசிகனுக்கும் தனது உணர்வுகளையும் கருத்தையும் தெரிவிக்க உரிமை உள்ளது என்றார்.
மேலும் பேசுகையில், ரோஹித்துடன் சமீப காலமாக தொடர்பு கொள்ளவில்லை என்று ஹர்திக் ஒப்புக்கொண்டார். இங்கிலாந்துக்கு எதிரான டெஸ்ட் தொடருக்கான இந்திய அணியுடன் ரோஹித் சர்மா பிஸியாக இருந்ததால் அதற்கான ஆயத்த பணிகளில் நாங்களும் ஈடுபட்டு வருவதால் ரோஹித்தை தொடர்பு கொள்ளவில்லை. ரோஹித் அணியில் சேரும்போது நாங்கள் மீண்டும் ஒன்றாக இருப்போம் என்று ஹர்திக் வெளிப்படையாக கூறினார்.
பந்துவீச்சிலும் முழு உடற்தகுதியுடன் இருப்பேன் :
அக்டோபர் 19 அன்று நடந்த உலகக் கோப்பையின் போது ஹர்திக் முழங்காலில் காயமடைந்தார், அதன் பிறகு கிரிக்கெட்டிலிருந்து முற்றிலும் விலகி இருந்தார். கடந்த மாதம் DY பாட்டீல் டி20 கிரிக்கெட் போட்டியில் விளையாடிய பிறகு, ஹர்திக் ஐபிஎல்லில் இருந்து மீண்டும் வருகிறார். அவர் முழு உடற்தகுதியுடன் இருப்பதாகவும், பந்துவீசுவார் என்றும் அவர் தெளிவுபடுத்தினார். ஐபிஎல்லில் அனைத்து போட்டிகளிலும் விளையாட முயற்சிப்பேன். இரண்டு மாதங்களுக்கு முன்புதான் நான் உடல்தகுதியுடன் இருந்தேன், அதனால் நான் காயத்துடன் 3 மாதங்கள் மட்டுமே வெளியே இருந்தேன். உலகக் கோப்பை முழங்கால் காயம் முதலில் எளிமையானதாகத் தோன்றியது. ஆனால் அதன் பிறகு அதன் தீவிரம் தெரிந்தது” என்றார். ரோஹித் குறித்த கேள்விக்கு பயிற்சியாளர் மார்க் பவுச்சர் கூறுகையில், ரோஹித் தற்போது சிறப்பான ஃபார்மில் உள்ளார். ஐபிஎல் போட்டியிலும் இதேபோன்ற ஆட்டத்தை அவரிடமிருந்து எதிர்பார்க்கிறோம்” என்று கூறினார்.
