த.வெ.க தலைவர் விஜய் அரசியல் பற்றிய அணுகுமுறையில் “அரசியலுக்கு வந்து பணம் சம்பாதிக்க வேண்டிய அவசியம் இல்லை” என்ற அறிக்கையை வெளியிட்டிருந்தார். இதனை ஊடகங்கள் பெரிதும் வெளியீடு செய்துள்ள நிலையில், அவரது இந்தக் கருத்துக்கு மார்க்சிஸ்ட் கம்யூனிஸ்ட் கட்சியின் மாநில செயலாளர் பெ. சண்முகம் கடுமையான விமர்சனத்துடன் பதிலளித்துள்ளார்.

இது பற்றி தன் அறிக்கையில் பெ. சண்முகம் கூறியதாவது: “விஜய் கூறுவது போல, அரசியலுக்கு வந்து பணம் சம்பாதிக்க வேண்டாம் என்பது ஒரு பெரிய தியாகம் என நினைக்கிறீர்களா? வரலாற்றை படியுங்கள், அது தான் உண்மையான தியாகம் என்பதைக் கூறும்,” என்றார். “இ.எம்.எஸ், ஜோதி பாசு, மாணிக் சர்க்கார், இ.கே. நாயனார், புத்ததேவ் பட்டாச்சாரியா, வி.எஸ். அச்சுதானந்தன் ஆகியோர் பல ஆண்டு காலம் அரசியலில் இருந்து மக்கள் நலனுக்காகவே உழைத்தவர்கள். பதவியை சொத்தாக மாற்றிக் கொள்ளாத தலைவர்கள். இவர்களைப் போன்றவர்களை எதிரிகளால் கூட குற்றம் சாட்ட முடியவில்லை**,” எனக் கூறினார்.

“இ.எம்.எஸ், பி.சுந்தரைய்யா, ஹர்கிசன் சிங் சுர்ஜித் போன்றவர்கள் கட்சியின் அகில இந்திய பொதுச் செயலாளர்களாக இருந்த காலத்தில், தங்கள் சொந்த சொத்துக்களையே கட்சிக்கு அர்ப்பணித்தவர்கள். இதுவே கம்யூனிஸ்ட் அரசியலின் மெய்ப்பொருள்.” “இது தலைவர்கள் மட்டுமல்ல, அடிப்படை உறுப்பினர்களும் கட்சிக்காக தங்கள் உடலையும், பொருளையும், ஆவியையும் தியாகம் செய்துள்ளார்கள்.

மேலும் பணம் சம்பாதிக்காமல் இருப்பதை தியாகம் என்று கூறுவதற்கு முன், கம்யூனிஸ்ட் தலைவர்கள் வாழ்ந்த வாழ்க்கையைப் புரிந்து கொள்ள வேண்டும்.” “மிஸ்டர் விஜய்… வரலாற்றை படியுங்கள்!”  “மக்கள் நலனுக்காக தியாகம் செய்வது என்றால் என்ன என்பதை அறிய, கம்யூனிஸ்ட் தலைவர்களின் வாழ்க்கையை வாசியுங்கள், நிஜமான தியாகம் எதுவென்று புரியும்.” என அவர் சாடினார்.