உத்தரப்பிரதேச மாநிலம் கோரக்பூரில் உள்ள எய்ம்ஸ் மருத்துவமனையில் பணியாற்றி வரும் வடகிழக்கு மாநிலத்தைச் சேர்ந்த பெண் மருத்துவர் ஒருவருக்கு, அங்குள்ள மூத்த மருத்துவர் பாலியல் தொல்லை மற்றும் இனரீதியான துன்புறுத்தல் அளித்ததாக எழுந்துள்ள புகார் பெரும் அதிர்ச்சியை ஏற்படுத்தியுள்ளது.

மேலும் பாதிக்கப்பட்ட மருத்துவர் அளித்த புகாரின் அடிப்படையில், சம்பந்தப்பட்ட மூத்த மருத்துவர் மீது பாலியல் வன்கொடுமை முயற்சி, சாதி மற்றும் இன ரீதியான அவமதிப்பு உள்ளிட்ட பல்வேறு பிரிவுகளின் கீழ் காவல்துறை வழக்குப்பதிவு செய்துள்ளது. இந்த விவகாரம் மருத்துவ வட்டாரத்தில் பெரும் கொந்தளிப்பை ஏற்படுத்தியுள்ளது. பணிபுரியும் இடத்தில் பாதுகாப்பு வழங்க வேண்டிய உயர் அதிகாரியே இத்தகைய இழிவான செயலில் ஈடுபட்டது.

இது குறிப்பாக, வடகிழக்கு மாநில மக்கள் மீதான இனவெறித் தாக்குதல்கள் மற்றும் பெண்களுக்கு எதிரான அத்துமீறல்கள் தொடர்கதையாகி வருவது கவலையளிப்பதாக சமூக ஆர்வலர்கள் சுட்டிக்காட்டுகின்றனர். இந்த சம்பவம் குறித்து எய்ம்ஸ் நிர்வாகம் மற்றும் காவல்துறை உரிய விசாரணை நடத்தி, குற்றவாளிக்கு கடுமையான தண்டனை வழங்க வேண்டும் என்பதே அனைவரின் எதிர்பார்ப்பாக உள்ளது.