செப்டம்பர் மாதம் தொடங்க உள்ள நிலையில், வங்கி வாடிக்கையாளர்கள் தங்களது பணப் பரிவர்த்தனைகளை முன்கூட்டியே திட்டமிட வேண்டிய நிலை ஏற்பட்டுள்ளது. ரிசர்வ் வங்கி வெளியிடும் விடுமுறைப் பட்டியலின்படி, செப்டம்பர் மாதத்தில் வார இறுதி நாள்கள் மற்றும் மாநில வாரியான பண்டிகை விடுமுறைகள் என மொத்தம் 16 நாள்கள் வங்கிகளுக்கு விடுமுறை உள்ளது. எனினும், இந்த விடுமுறை அனைத்து மாநிலங்களுக்கும் ஒரே மாதிரியாக இருக்காது. குறிப்பிட்ட மாநிலங்களில் மட்டும் சில நாள்கள் வங்கிகள் மூடப்பட்டிருக்கும் என்பதால், வாடிக்கையாளர்கள் தங்கள் பகுதிக்கான விடுமுறை நாள்களை அறிந்து கொள்வது அவசியம்.

செப்டம்பர் 4-ஆம் தேதி ஜன்மாஷ்டமியை முன்னிட்டு தமிழகம் உள்ளிட்ட பல மாநிலங்களில் வங்கிகளுக்கு விடுமுறை அறிவிக்கப்பட்டுள்ளது. செப்டம்பர் 11-ஆம் தேதி ஜெய்ப்பூரில் நடைபெறும் தேர்தலை முன்னிட்டு வங்கி விடுமுறை உள்ளது. இதேபோல், செப்டம்பர் 12-ஆம் தேதி அசாம் மாநிலத்தில் ஸ்ரீமந்த சங்கரதேவரின் திருபாவ திதியை முன்னிட்டு வங்கிகள் இயங்காது. இதனால் அந்தந்த மாநிலங்களில் வசிக்கும் வாடிக்கையாளர்கள் முக்கியமான பணப் பரிவர்த்தனைகளை விடுமுறைக்கு முன்பே மேற்கொள்வது நல்லது.

செப்டம்பர் 14-ஆம் தேதி விநாயகர் சதுர்த்தி உள்ளிட்ட பண்டிகைகளை முன்னிட்டு தமிழகம், மகாராஷ்டிரம், கர்நாடகம் உள்ளிட்ட பல மாநிலங்களில் வங்கிகளுக்கு விடுமுறை அளிக்கப்படுகிறது. செப்டம்பர் 15-ஆம் தேதி குஜராத் மற்றும் ஒடிசா மாநிலங்களில் நடைபெறும் பண்டிகைகளை முன்னிட்டு வங்கிகள் மூடப்பட உள்ளன. இதைத்தொடர்ந்து, செப்டம்பர் 21 முதல் 25-ஆம் தேதி வரை அசாம், கேரளம், ஜார்க்கண்ட், ஜம்மு-காஷ்மீர், சிக்கிம் உள்ளிட்ட மாநிலங்களில் பல்வேறு காரணங்களுக்காக வங்கி விடுமுறைகள் உள்ளன. எனவே, இந்த நாள்களில் வங்கி கிளைக்கு நேரில் சென்று பணிகளை மேற்கொள்ள வேண்டியவர்கள் முன்கூட்டியே திட்டமிட வேண்டும்.

இதுதவிர, நாடு முழுவதும் ஞாயிற்றுக்கிழமைகள் மற்றும் மாதத்தின் இரண்டாவது, நான்காவது சனிக்கிழமைகளில் வங்கிகள் வழக்கம்போல் செயல்படாது. வங்கி கிளைகள் மூடப்பட்டிருந்தாலும், வாடிக்கையாளர்களின் பெரும்பாலான இணையவழி சேவைகள் தொடர்ந்து செயல்படும். ஏடிஎம், யுபிஐ, இணைய வங்கி மற்றும் கைப்பேசி வங்கி சேவைகளை வழக்கம்போல் பயன்படுத்த முடியும். எனினும், காசோலை, ரொக்கப் பரிவர்த்தனை உள்ளிட்ட கிளை சார்ந்த பணிகள் இருந்தால், வங்கி விடுமுறை நாள்களை கருத்தில் கொண்டு முன்கூட்டியே மேற்கொள்வது அவசியம்.