சென்னை செங்குன்றம் அடுத்த பகுதியை சேர்ந்தவர் ரத்தினவேல் பாண்டியன் (40). எலக்ட்ரீசியனாக வேலை பார்த்து வந்த இவருக்கு மனைவியும் இரண்டு மகன்களும் உள்ளனர். எனினும், குடும்பத்தில் ஏற்பட்ட கருத்து வேறுபாடு காரணமாக மனைவியும் மகன்களும் இவரைப் பிரிந்து தனியாக வசித்து வந்துள்ளனர்.

இந்தத் தனிமையைச் சாதகமாகப் பயன்படுத்திக் கொண்ட ரத்தினவேல் பாண்டியனுக்கும், அவரது மைத்துனரான சரவணன் (39) என்பவரின் மனைவிக்கும் இடையே கள்ளத்தொடர்பு ஏற்பட்டுள்ளது. இந்தத் தொடர்பைக் கேள்விப்பட்ட சரவணன், ரத்தினவேல் பாண்டியனைப் பலமுறை நேரில் சந்தித்துக் கண்டித்துள்ளார். ஆனால், எலக்ட்ரீசியனோ எதைப் பற்றியும் கவலைப்படாமல் கள்ளக்காதலைத் தொடர்ந்ததாகக் கூறப்படுகிறது. இதனால் ஆத்திரத்தின் உச்சிக்குச் சென்ற சரவணன், அவரை எப்படியாவது தீர்த்துக்கட்ட வேண்டும் என்று தனது கூட்டாளிகளுடன் சேர்ந்து ரகசியத் திட்டம் தீட்டியுள்ளார்.

அதன்படி, நேற்று காலை 10 மணி அளவில் செங்குன்றத்தை அடுத்த தெருவில் ரத்தினவேல் பாண்டியன் தனது பைக்கில் சென்று கொண்டிருந்தார். அப்போது திட்டமிட்டபடி வழிமறித்த மைத்துனர் சரவணன், அவரது தம்பி தனசேகர் (34) மற்றும் உறவினர் பழனிசாமி (45) ஆகிய மூவரும் சேர்ந்து அரிவாளால் அவரைச் சரமாரியாக வெட்டினர். இதில் உடல் முழுவதும் பலத்த வெட்டுக்காயங்களுடன் ரத்த வெள்ளத்தில் சரிந்த ரத்தினவேல் பாண்டியன் சம்பவ இடத்திலேயே பரிதாபமாகத் துடிதுடித்து உயிரிழந்தார். கொலைவெறி தாக்குதலை நடத்திய அந்த மூவரும் உடனடியாக அங்கிருந்து தப்பியோடினர்.

இதுகுறித்துத் தகவலறிந்த  போலீசார் உடனடியாகச் சம்பவ இடத்திற்கு விரைந்து சென்றனர். அங்கு ரத்தினவேல் பாண்டியனின் உடலைக் கைப்பற்றிய போலீசார், பிரேத பரிசோதனைக்காகச் சென்னை அரசு மருத்துவமனைக்கு அனுப்பி வைத்தனர். இந்தச் சம்பவம் தொடர்பாக வழக்குப்பதிவு செய்த தனிப்படை போலீசார், தலைமறைவாக இருந்த மைத்துனர் சரவணன், தனசேகர் மற்றும் பழனிசாமி ஆகிய மூன்று பேரையும் அதிரடியாகக் கைது செய்து தீவிர விசாரணை நடத்தி வருகின்றனர். பட்டப்பகலில் பைக்கில் சென்ற நபர் வெட்டிக் கொல்லப்பட்ட இந்தச் சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.