தேனி மாவட்டம் கம்பம் அரசு மருத்துவமனை தற்போது பிரசவ வார்டாக தரம் உயர்த்தப்பட்டு, ரூ.10 கோடி திட்ட மதிப்பீட்டில் பணிகள் நடைபெற்று வருகின்றன. 2022 இன் ஆரம்ப மாதங்களில் தொடங்கப்பட்ட கட்டுமானப் பணிகள், முதலில் ஒரு வருடத்திற்குள் முடிக்க திட்டமிடப்பட்டது. ஆனால், இரண்டு ஆண்டுகளாகியும் கட்டுமான பணி முடிக்கப்படாமல் இருந்தது.

இந்நிலையில், போர்டிகோவில் தொழிலாளர்கள் வேலை செய்து கொண்டிருந்தபோது, ​​ தூண்கள் திடீரென இடிந்து விழுந்ததில் மதுரையைச் சேர்ந்த நம்பிராஜன் என்பவர் பரிதாபமாக உயிரிழந்தார். மேலும் காயமடைந்த மதுரையைச் சேர்ந்த செல்வம் சதீஷ்குமார் ஆகிய 2 தொழிலாளர்களும் உடனடியாக அரசு மருத்துவமனைக்கு சிகிச்சைக்காக கொண்டு செல்லப்பட்டனர்.

இதை தொடர்ந்து, பொதுமக்கள் தங்கள் கவலைகளை தெரிவித்து, அரசு மருத்துவமனையை உயர் தரத்துடன் கட்ட வேண்டும் என கோரிக்கை விடுத்து போராட்டம் நடத்தினர். மேலும் சதீஷ்குமார் அளித்த புகாரின் பேரில், கட்டுமான பணியில் ஈடுபட்ட ஒப்பந்ததாரர், பொறியாளர், மேற்பார்வையாளர் உள்ளிட்ட 5 பேர் மீது வழக்கு பதிவு செய்யப்பட்டு விசாரணை மேற்கொள்ளப்பட்டு வருகிறது. அதே போல், இறந்த நம்பிராஜனின் குடும்பத்தினர் மற்றும் காயமடைந்த தொழிலாளர்களுக்கும் தேவையான உதவி மற்றும் ஆதரவை வழங்குமாறும் வேண்டுகோள் விடுத்துள்ளனர்.