“டாக்டர்.. பல்லு வலியால என் பையன் ராத்திரி முழுக்க தூங்கவே இல்லை; இந்தச் சொத்தையைக் குணப்படுத்த ஏதாவது ஆயுர்வேத பேஸ்ட் அல்லது மூலிகை எண்ணெய் கொடுங்க” என்று பதற்றத்துடன் கதறியபடி, முக வீக்கத்துடன் இருந்த தனது 10 வயது மகனை அழைத்துக்கொண்டு தாய் ஒருவர் மருத்துவமனைக்கு வந்துள்ளார். அந்தப் பையனைப் பரிசோதித்த மருத்துவர், பல்லின் மேலடுக்கான ‘இனாமல்’ (Enamel) முற்றிலும் சேதமடைந்து, சொத்தை பல்லின் வேர் வரை பரவிப் பாதிப்பை ஏற்படுத்தியிருப்பதைக் கண்டறிந்தார்.

அப்போது அந்தத் தாய்க்குப் புரியவைத்த மருத்துவர், “ஆயுர்வேதம் பற்களைப் பாதுகாக்கப் பல வழிகளைச் சொன்னாலும், ஒருமுறை பல்லில் பெரிய ஓட்டை விழுந்துவிட்டால், அதை அடைக்கவோ அல்லது ‘ரூட் கெனால்’ (Root Canal) சிகிச்சை செய்யவோ பல் மருத்துவரை  அணுகுவதுதான் ஒரே வழி. இழந்த இனாமலை ஆயுர்வேதத்தால் மீண்டும் வளரச் செய்ய முடியாது” என்று தெளிவுபடுத்தினார்.

இதையடுத்து அந்தச் சிறுவனுக்குத் தற்காலிக அவசர சிகிச்சை அளிக்கப்பட்டு, பின்னர் மருத்துவரின் ஆலோசனையின்படி ஆயுர்வேத முறைகளும் பின்பற்றப்பட்டதால், தற்போது அந்தச் சிறுவன் பல் வலியிலிருந்து முழுமையாகக் குணமடைந்துள்ளான். ஆயுர்வேதத்தின்படி, கப தோஷத்தின் சமநிலையின்மையே பற்சொத்தைக்கு முக்கியக் காரணமாகும்.

ஆரம்பக்கட்ட பல் கூச்சம் மற்றும் சொத்தையைத் தடுக்கத் தினமும் காலையில் நல்லெண்ணெய் அல்லது தேங்காய் எண்ணெய் மூலம் ஆயில் புல்லிங் (Oil Pulling) செய்வது, ரசாயனப் பேஸ்ட்டுகளுக்குப் பதிலாக திரிபலா, வேம்பு, கிராம்பு, அதிமதுரம் கலந்த மூலிகைப் பொடிகளால் பற்களை மசாஜ் செய்வது, மற்றும் கிராம்பு எண்ணெய் பயன்படுத்துவது நல்ல பலனைத் தரும். பல்லில் கருப்பு அல்லது பழுப்பு நிற ஓட்டைகள் விழுந்தால் அலட்சியம் செய்யாமல், நவீன பல் மருத்துவத்தையும், பாரம்பரிய ஆயுர்வேதப் பழக்கவழக்கங்களையும் இணைத்துப் பின்பற்றுவதே நமது பற்களைப் பாதுகாக்கும் சிறந்த வழியாகும்