தமிழக சட்டசபை தேர்தல் பிரசாரம் சூடுபிடித்துள்ள நிலையில், சேப்பாக்கம் – திருவல்லிக்கேணி தொகுதியில் அதிமுக பொதுச்செயலாளர் எடப்பாடி பழனிசாமி தீவிர வாக்குச் சேகரிப்பில் ஈடுபட்டார். அப்போது திமுக அமைச்சரும், அத்தொகுதியின் வேட்பாளருமான உதயநிதி ஸ்டாலினை கடுமையாக விமர்சித்துப் பேசிய அவர், நீட் தேர்விலிருந்து விலக்கு பெறுவதற்கான ரகசியம் தங்களுக்குத் தெரியும் என்று கூறி ஆட்சிக்கு வந்த திமுக, இதுவரை அந்த ரகசியத்தை வெளிப்படுத்தாதது ஏன் என்று கேள்வி எழுப்பினார்.

மேலும் அந்த ரகசியத்தைச் சொன்னால் ‘ராஜா காது கழுதை காது’ கதையாகிவிடும் என்று உதயநிதி பயப்படுகிறாரா என கிண்டல் செய்த பழனிசாமி, நீட் விவகாரத்தில் காங்கிரஸும் திமுகவும் தவறு செய்துவிட்டு, தற்போது அதிமுக மீது பழி சுமத்துவதாகக் குற்றம் சாட்டினார்.

மேலும், தனது தொகுதியில் கொடுத்த வாக்குறுதிகளை உதயநிதி நிறைவேற்றவில்லை என்றும், கொரோனா காலக்கட்டத்தில் மக்கள் துயரத்தில் இருந்தபோது முதல்வர் ஸ்டாலினை எங்குமே காணவில்லை என்றும் எடப்பாடி பழனிசாமி விமர்சித்தார்.

இதனால் “முதல்வரை காணவில்லை” என்று கூறியதற்காக தன் மீது முன்வைக்கப்படும் விமர்சனங்களுக்குப் பதிலளித்த அவர், தான் யாரையும் தனிப்பட்ட முறையில் தாக்கவில்லை என்றும், மக்கள் பணியில் ஈடுபடாமல் போட்டோ ஷூட் நடத்துவதில் மட்டுமே ஆர்வம் காட்டுபவர்கள் இக்கட்டான சூழலில் எங்கே போனார்கள் என்பதைத் தான் சுட்டிக்காட்டியதாகவும் விளக்கமளித்தார். திமுகவினரின் அவதூறுகளுக்குத் தான் எப்போதும் உடனுக்குடன் தக்க பதிலடி தருவேன் என்றும் அவர் உறுதிபடத் தெரிவித்தார்.