உத்தரப்பிரதேச மாநிலம் அலிகார் மாவட்டத்தில் உள்ள அரசு ஜூனியர் உயர்நிலைப் பள்ளியில் பயிலும் 11 வயதான 7ஆம் வகுப்பு மாணவிக்கு பள்ளி தலைமை ஆசிரியர் ஷகீல் அகமது எழுதிய காதல் கடிதம் பரபரப்பை ஏற்படுத்தியுள்ளது.
குற்றச்சாட்டுப்படி, மாணவியை தொடர்ந்து தவறான எண்ணத்தில் நோட்டமிடும் வகையில் காதல் வார்த்தைகள் நிறைந்த கடிதம் எழுதி, திருமணம் செய்ய விருப்பம் தெரிவித்ததாக மாணவியின் தாயார் போலீசில் புகார் அளித்துள்ளார். குற்றவாளி, மாணவியிடம் யாரிடமும் இதைப் பற்றி கூற கூடாது என மிரட்டியதாலும் மாணவி மனஉளைச்சலில் இருந்த நிலையில் , தாயார் வற்புறுத்தி கேட்டதால் உண்மை வெளிச்சத்திற்கு வந்தது.
இந்த சம்பவம் மாவட்ட காவல் கண்காணிப்பாளரின் கவனத்திற்கு கொண்டு செல்லப்பட்டபோது, உடனடியாக விசாரணை ஆரம்பிக்கப்பட்டது. புகாரின் அடிப்படையில், தலைமை ஆசிரியர் ஷகீல் அகமதின் மீது போக்சோ சட்டத்தின் கீழ் வழக்குப் பதிவு செய்யப்பட்டது. அதன்பிறகு அவர் கைது செய்யப்பட்டு, சிறையில் அடைக்கப்பட்டுள்ளார்.
மாணவிக்கு மருத்துவ பரிசோதனை மேற்கொள்ளப்பட்டு, அவரது பாதுகாப்பிற்கான நடவடிக்கைகளும் மேற்கொள்ளப்பட்டுள்ளன. இந்த விவகாரம் சமூகத்தில் பெரும் கண்டனத்தை ஏற்படுத்தியுள்ளது.
இந்நிலையில், அடிப்படை கல்வி அதிகாரி ராகேஷ் குமார், குற்றம் சாட்டப்பட்ட முதல்வரை உடனடியாக இடைநீக்கம் செய்துள்ளார். மேலும் அவரது ஆசிரியர் பணியை முற்றாக நிறுத்துவதற்கான அதிகாரப்பூர்வ நடவடிக்கைகள் முன்னெடுக்கப்பட்டுள்ளன. போலீசார் தொடர்ந்து விசாரணை செய்து வருவதோடு, மாணவியின் குடும்பத்தினர் சம்பவத்திற்கான முழுமையான நீதி கிடைக்க வேண்டும் என வலியுறுத்தி வருகின்றனர். குழந்தைகள் பாதுகாப்பு குறித்து பள்ளிகளில் மேலும் விழிப்புணர்வு தேவைப்படுகிற நிலையில், இது போன்ற சம்பவங்கள் பெற்றோர் மற்றும் பொதுமக்களில் அதிர்ச்சியை ஏற்படுத்தியுள்ளது.
