உக்ரைன் போரின் போது ரஷ்யாவிடம் இருந்து இந்தியா அதிக அளவில் கச்சா எண்ணெய் வாங்கியது உலகளவில் பெரிய விவாதமாக இருந்தது. இதுகுறித்து டெல்லியில் நடந்து வரும் குவாட் மாநாட்டிற்கு இடையே, அமெரிக்க வெளியுறவுத்துறை அமைச்சர் மார்கோ ரூபியோ முக்கிய விளக்கம் ஒன்றை அளித்துள்ளார்.

ரஷ்ய எண்ணெய் மீது அமெரிக்கா விதித்த தடைகள் எந்த சூழ்நிலையிலும் இந்தியாவை மட்டும் குறிவைத்து எடுக்கப்பட்ட நடவடிக்கை அல்ல என்றும், உக்ரைன் போரை நிறுத்த ரஷ்யாவுக்கு பொருளாதார ரீதியாக அழுத்தம் கொடுப்பதற்காக உலகளவில் எடுக்கப்பட்ட ஒரு பொதுவான முயற்சிதான் அது என்றும் அவர் தெளிவுபடுத்தியுள்ளார்.

அமெரிக்காவின் நோக்கம் போரை முடிவுக்குக் கொண்டு வருவதே தவிர, இந்தியாவை சங்கடத்தில் ஆழ்த்துவது அல்ல என்று கூறிய அவர், அதே நேரத்தில் இந்தியா தனது எரிசக்தி தேவைகளுக்காக மற்ற நாடுகளையும் நாடி, தனது வர்த்தகத்தை விரிவுபடுத்தி வருவதை அமெரிக்கா கவனித்து வரவேற்பதாகவும் குறிப்பிட்டுள்ளார்.

மேலும், ஈரான் உடனான பதற்றமான சூழல் மற்றும் உலகளவில் கச்சா எண்ணெய் விலை உயர்வு குறித்தும் அவர் பேசினார். ஹார்முஸ் நீரிணை பகுதியை ஈரான் தனது கட்டுப்பாட்டுக்குள் கொண்டு வர சட்டவிரோதமாக முயற்சிப்பதும், தங்களது விதிமுறைகளை மதிக்காத வர்த்தகக் கப்பல்களை மூழ்கடிப்போம் என மிரட்டுவதுமே எண்ணெய் விலை உயர்வுக்கு முக்கிய காரணம் என்று குற்றம் சாட்டினார்.

இந்த ஈரான் பிரச்சனைக்கும், அவர்களின் அணு ஆயுத அச்சுறுத்தலுக்கும் பேச்சுவார்த்தை மூலம் மட்டுமே அமைதியான முறையில் தீர்வு காண அமெரிக்கா விரும்புவதாகவும் மார்கோ ரூபியோ தனது பேட்டியில் விரிவாகப் பகிர்ந்துள்ளார்.