அரசியல் களத்தில் இருப்பவர்களின் தனிப்பட்ட வாழ்க்கையை பொதுவெளியில் விமர்சிப்பது மிகவும் அநாகரிகமான செயல் என்று திமுக எம்.பி. கனிமொழி சோமு தனது கடும் கண்டனத்தைப் பதிவு செய்துள்ளார். நடிகை திரிஷா குறித்து பாஜக மாநிலத் தலைவர் நயினார் நாகேந்திரன் பேசிய கருத்துக்கள் தற்போது பெரும் புயலைக் கிளப்பியுள்ள நிலையில், அரசியலுக்குச் சற்றும் சம்பந்தமில்லாத ஒரு பெண்ணின் கண்ணியத்தைத் தரம் தாழ்ந்த முறையில் விமர்சிப்பது ஒரு தலைவருக்கு அழகல்ல என்று அவர் சாடியுள்ளார்.
இது தொடர்பாக அவர் எழுப்பியுள்ள மற்றொரு முக்கியமான கேள்வி, பாஜக-வில் உள்ள பெண் தலைவர்களையே குறிவைத்துள்ளது. “தன் கட்சியின் தலைவர் ஒரு பெண்ணைப் பற்றி இழிவாகப் பேசும்போது, அதே கட்சியில் இருக்கும் மற்ற பெண் தலைவர்கள் ஏன் மவுனம் காக்கிறார்கள்?” என்று அவர் வினவியுள்ளார். அநீதி இழைக்கப்படும்போது அமைதியாக இருப்பது அந்த அநீதிக்குத் துணை போவதற்குச் சமம் என்றும் அவர் குறிப்பிட்டுள்ளார். பெண்களை மதிக்கத் தெரியாதவர்களின் அரசியல் நீண்ட காலம் எடுபடாது என்று எச்சரித்துள்ள கனிமொழி சோமுவின் இந்த அறிக்கை, சமூக வலைதளங்களில் வைரலாகி வருகிறது.
