இந்திய கலாச்சாரம் என்பது வெறும் உடைகளிலோ அல்லது மொழியிலோ இல்லை; அது எளிய மனிதர்களின் இதயங்களில் வாழும் ஒரு மாறாத அன்பு. பாரத மண்ணின் இந்தத் தொன்மையான பண்பாட்டால் ஈர்க்கப்பட்டு, பல்லாயிரக்கணக்கான மைல்களுக்கு அப்பால் இருக்கும் அர்ஜென்டினா தேசத்திலிருந்து ஒரு வெளிநாட்டுச் சுற்றுலாப் பயணிகள் குழு, ஆக்ராவின் உலகப் புகழ்பெற்ற காதல் சின்னமான தாஜ்மஹாலைக் காண வந்திருந்தது.

இந்திய உடைகளின் மீதான மோகத்தால், அந்த அர்ஜென்டினா பெண்கள் அழகிய சேலைகளையும், ஆண்கள் பாரம்பரிய குர்தா பைஜாமாக்களையும் அணிந்து, செவ்வாய்க்கிழமை காலை 7 மணிக்கெல்லாம் தாஜ்மகாலின் மேற்கு நுழைவாயிலுக்குள் நுழைந்தனர்.

ஆனால், ஒரு பெண்ணுக்குத் தன் வாழ்நாளின் ஆகச்சிறந்த கனவுப் பயணமாக இருக்க வேண்டிய அந்தத் தருணம், எதிர்பாராதவிதமாக ஒரு பெரிய சங்கடமான சூழ்நிலையாக மாறும் என்று அந்த வெளிநாட்டுப் பெண் நினைத்திருக்க மாட்டார்.

இந்தியப் பெண்களுக்குச் சேலை கட்டுவது என்பது பழகிய கலை; ஆனால், ஒரு வெளிநாட்டுப் பெண்ணுக்கு அது ஒரு புதிய அசாத்திய அனுபவம். தாஜ்மஹால் வளாகத்தின் அழகை ரசித்துக்கொண்டே அந்த அர்ஜென்டினா பெண் நடந்து சென்றபோது, எதிர்பாராதவிதமாக அவரது சேலை திடீரென அவிழ்ந்து தளரத் தொடங்கியது.

நூற்றுக்கணக்கான உள்நாட்டு மற்றும் வெளிநாட்டுப் பயணிகள் நடமாடும் அந்தப் பொது இடத்தில், ஆடை அவிழ்ந்ததை உணர்ந்த கணத்தில், அந்தப் பெண்ணின் முகம் பயத்தாலும் சங்கடத்தாலும் வெளுத்துப் போனது. அதை எப்படிச் சரிசெய்வது என்று தெரியாமல், மொழியும் புரியாமல், சுற்றிலும் இருந்த மனிதர்களின் பார்வைகளுக்கு நடுவே அந்த அந்நியத் தளிர் தவித்துப் போய் நின்றது.

அந்தத் தவிப்பைக் கண்ட அடுத்த வினாடி, அங்கே பாதுகாப்புப் பணியில் ஈடுபட்டிருந்த உத்தரப் பிரதேச பெண் காவலர் ‘குட்டி தேவி’ ஒரு நொடி கூடத் தாமதிக்கவில்லை. தன் கையில் இருந்த கடமைகளைத் தாண்டி, ஒரு பெண்ணின் தவிப்பை உணர்ந்த தாயுள்ளத்தோடு அவர் அந்த வெளிநாட்டுப் பெண்ணை நோக்கி விரைந்து சென்றார்.

சுற்றிலும் இருந்தவர்களின் பார்வைகள் அந்தப் பெண்ணின் மீது படாதவாறு அரணாக நின்று, பதறிப்போயிருந்த அந்த வெளிநாட்டுத் தோழியைத் தன் இன்முகத்தால் அமைதிப்படுத்தினார் குட்டி தேவி. பின்னர், தன் சொந்தக் கரங்களால் அந்த அர்ஜென்டினா பெண்ணுக்கு மிக லாவகமாகச் சேலையை மீண்டும் உடுத்தி, அதன் மடிப்புகளைச் சரிசெய்து அழகுபடுத்தினார். ஒரு காவலரின் சீருடைக்குள்ளே மறைந்திருந்த அந்த உன்னதமான இந்தியப் பெண்ணின் மனிதநேயம், அந்தப் பனிப்பொழுதில் தாஜ்மஹாலை விடவும் அழகாக மிளிர்ந்தது.

இந்தச் சம்பவத்தில்  காண்பது இந்தியாவின் உண்மையான ஆன்மாவைத்தான். சட்டம், ஒழுங்கு, பாதுகாப்பு என்பதையெல்லாம் தாண்டி, நம் மண்ணை நம்பி வந்த ஒரு பெண்ணின் கண்ணியத்தைக் காக்க ஓடிவந்த குட்டி தேவியின் செயல் போற்றத்தக்கது.

காவலர் குட்டி தேவி செய்த இந்த அன்பான உதவியால் அந்த வெளிநாட்டுப் பெண் சுற்றுலாப் பயணி ஒட்டுமொத்தமாக நெகிழ்ந்து போனார். அவரது கண்களில் இருந்த பயம் மறைந்து, உதடுகளில் ஒரு பேரழகுப் புன்னகை பூத்தது. நெஞ்சார உ.பி. காவல்துறைக்குத் தனது நன்றியைத் தெரிவித்ததோடு மட்டுமல்லாமல், அந்த உன்னதத் தருணத்தை தன் வாழ்நாளின் ஆகச்சிறந்த நினைவாக மாற்றிக் கொள்ள, அந்தப் பெண் காவலருடன் இணைந்து ஒரு நெகிழ்ச்சியான புகைப்படமும் எடுத்துக் கொண்டார்.

“>

இந்தத் தருணத்தின் புகைப்படம் தற்போது சமூக வலைதளங்களில்  பரவி, ஒட்டுமொத்த இணையவாசிகளின் இதயங்களையும் வென்று வருகிறது. “உண்மையான இந்தியப் பண்பாடு இதுதான்!” என்று லட்சக்கணக்கான மக்கள் அந்தப் பெண் காவலரைப் பாராட்டி வருகிறார்கள்.

தாஜ்மஹாலின் பளிங்குக் கற்கள் காதலைச் சொல்லலாம். ஆனால், அந்த வளாகத்தில் ஒரு அந்நியப் பெண்ணின் கண்ணியம் காக்க நீண்ட குட்டி தேவியின் கரங்கள்தான், நம் தேசம் உலகிற்குச் சொல்லும் உண்மையான அன்பின் இலக்கணம். மொழிகள் வேறாக இருந்தாலும், உடைகள் அந்நியமாக இருந்தாலும், மனிதநேயத்தின் மொழி ஒன்றுதான் என்பதை ஆக்ராவின் இந்தச் சம்பவம் உலகிற்கு மீண்டுமொருமுறை நிரூபித்துள்ளது!