சேலம் மாவட்டம் சங்ககிரி அருகே உள்ள வைகுந்தம் வெள்ளையம்பாளையம் கிராமத்தைச் சேர்ந்த சின்னபொண்ணு (வயது 70) என்ற மூதாட்டி, 6 சவரன் நகைக்காக கொடூரமாகக் கொலை செய்யப்பட்ட சம்பவம் மாவட்டத்தில் பெரும் பரபரப்பை ஏற்படுத்தியுள்ளது.

சின்னபொண்ணுவிற்கு 3 மகன்கள் மற்றும் ஒரு மகள் உள்ளனர். இவர்களில் ஒருவரான கோவிந்தன் இறந்துவிட்ட நிலையில், மற்றவர்கள் திருமணம் ஆனவுடன் தனித்தனியாக வசித்து வந்தனர். கணவர் சித்தனும் சில ஆண்டுகளுக்கு முன்னர் இறந்துவிட்டதால், சின்னபொண்ணு தனியாக வாழ்ந்துவருகிறார். இவர்  வாழ்க்கையை நடத்த, வைகுந்தம் மற்றும் அருகிலுள்ள சந்தைகளில் காய்கறிகளை வாங்கி விற்பனை செய்வது அவர் வழக்கமான தொழிலாக இருந்தது.

இந்தநிலையில், கடந்த 23-ம் தேதி சின்னபொண்ணு மாடு வாங்க வேண்டும் என விருப்பம் தெரிவித்தார். இதையடுத்து, அதே பகுதியை சேர்ந்த ஏழுமலை என்ற நபர், தனது மோட்டார் சைக்கிளில் சின்னபொண்ணுவை கொங்கணாபுரம் சந்தைக்கு அழைத்துச் சென்றதாக கூறினார்.

ஆனால், பிற்பாடு மூதாட்டி வீடு திரும்பவில்லை. ஏழுமலை மட்டும் ஊருக்கு வந்ததை கவனித்த சின்னபொண்ணுவின் மகன் மதியழகன் பல இடங்களில் தேடியும் எந்த தடமும் கிடைக்காததால், சங்ககிரி காவல் நிலையத்தில் புகார் அளித்தார்.

போலீசார் முதலில் காணாமல் போனவர்கள் தொடர்பான வழக்காக விசாரித்தனர். ஆனால், சந்தைக்கு அழைத்துச் சென்ற ஏழுமலையின் நடத்தை சந்தேகத்தை ஏற்படுத்தியது. இதனையடுத்து போலீசார் அவரை கைது செய்து கடுமையாக விசாரித்த போது, அவர் சின்னபொண்ணுவை அவரது கழுத்தில் இருந்த 6 சவரன் நகைக்காக கொலை செய்ததாக ஒப்புக்கொண்டார்.

சந்தைக்கு செல்லும் போதே நகையை பார்த்ததும் ஆசை ஏற்பட்டதால், மாடு வாங்கும் பெயரில் சின்னபொண்ணுவை ஒரு தனிமையான இடத்திற்கு அழைத்துச் சென்றதாகவும், அங்கே கொலை செய்து உடலை சாக்கு மூட்டையில் கட்டி பவளத்தான் ஏரியில் வீசி விட்டதாகவும் தெரிவித்தார்.

ஏழுமலை அளித்த தகவலின்படி, சங்ககிரி போலீசார் பவளத்தான் ஏரியில் சென்று சாக்கு மூட்டையை கண்டுபிடித்து திறந்த போது, அதில் சின்னபொண்ணுவின் உடல் இருப்பது உறுதி செய்யப்பட்டது. உடல் மீட்கப்பட்டு பிரேத பரிசோதனைக்காக சேலம் அரசு மருத்துவமனைக்கு அனுப்பிவைக்கப்பட்டது. இதனையடுத்து வழக்கு கொலை வழக்காக மாற்றப்பட்டு, தொழிலாளி ஏழுமலை கைது செய்யப்பட்டுள்ளார். அவரது மீது மேலும் விசாரணை நடைபெற்று வருகிறது.

இந்த சம்பவம் தொடர்பாக கிராம மக்கள் அதிர்ச்சி மற்றும் கோபத்தில் உள்ளனர். மூதாட்டி போன்ற பாதுகாப்பற்ற பெண்கள் மீது நடைபெறும் இத்தகைய கொடூரங்கள் குறித்து சமூகத்தில் கடும் அதிருப்தி நிலவுகிறது. சின்னபொண்ணுவின் மகன்கள் தங்கள் தாயின் மரணத்திற்கு நீதி கோரி உருக்கம் வெளியிட்டுள்ளனர்.