திண்டுக்கல் மாவட்டம் பட்டிவீரன்பட்டி அருகே உள்ள அய்யங்கோட்டை கிராமத்தைச் சேர்ந்தவர் கொடியரசன் கிருஷ்ணன் (வயது 25). டிப்ளமோ என்ஜினீயரிங் படித்த இவர், மதுரை திருமங்கலத்தில் உள்ள தனியார் மில்லில் தங்கி பெயிண்டர் வேலை செய்து வந்தார்.

கடந்த 11ம் தேதி விடுமுறையில் கிருஷ்ணன் தனது ஊருக்கு வந்திருந்தார். அப்போது, அய்யங்கோட்டையில் பெண்களை கேலி செய்ததாக அ.புதூரைச் சேர்ந்த தனபாண்டி மீது குற்றச்சாட்டு எழுந்தது. இதையறிந்த கிருஷ்ணன், தனபாண்டியை நேரில் சென்று தட்டிக் கேட்டதாக கூறப்படுகிறது. இருவருக்கும் இடையில் வாக்குவாதம் ஏற்பட்டு கிருஷ்ணன் பின்னர் வீட்டுக்கு திரும்பி வந்தார்.

இந்தச் சம்பவத்தை தொடர்ந்து ஆத்திரமடைந்த தனபாண்டி, தனது தம்பி நாகபாண்டி (23), நண்பர் சந்தீப் சஞ்சய் மற்றும் மற்ற உறவினர்களுடன் சேர்ந்து, இரவு நேரத்தில் கிருஷ்ணனை வீடில் தூங்கிக் கொண்டிருந்தபோது எழுப்பி, அருகிலுள்ள கோவில் பகுதிக்கு அழைத்துச் சென்றனர்.

அங்கு மீண்டும் வாக்குவாதம் ஏற்பட்டதில், மூவரும் முன்கூட்டியே மறைத்து வைத்திருந்த அரிவாளால் கிருஷ்ணனை சரமாரியாக வெட்டி கொலை செய்தனர். ரத்த வெள்ளத்தில் பலத்த காயங்களுடன் உயிரிழந்த கிருஷ்ணனை பார்த்த அக்கம் பக்கத்தினர் அதிர்ச்சி அடைந்தனர். பின்னர் மூவரும் சம்பவ இடத்தில் இருந்து தப்பியோடியதாக கூறப்படுகிறது.

தகவலறிந்ததும் அங்கு விரைந்த போலீசார், தனபாண்டி, நாகபாண்டி, சந்தீப் சஞ்சய் ஆகிய மூவரையும் கைது செய்து, அவர்களிடம் விசாரணை நடத்தி வருகின்றனர். இச்சம்பவம் அய்யங்கோட்டை உள்ளிட்ட சுற்றுவட்டார கிராமங்களில் பெரும் பரபரப்பை ஏற்படுத்தியுள்ளது.

பெண்களை காப்பாற்றியதற்காக ஒரு இளைஞர் கொடூரமாக கொல்லப்பட வேண்டும் என்ற நிலைமை, பொதுமக்களில் சோகத்தையும் கோபத்தையும் கிளப்பி உள்ளது.