டெல்லியின் சீலம்பூர் பகுதியில் நடைபெற்ற போராட்டத்தின் போது, ஒரு பெண் ஆக்ரோஷமாகப் பேசிய வீடியோ சமூக வலைதளங்களில் தீயாய் பரவி வருகிறது. ஈரான் நாட்டின் உச்ச தலைவர் அயதுல்லா அலி கமேனி, இஸ்ரேல் மற்றும் அமெரிக்காவின் கூட்டுத் தாக்குதலில் கொல்லப்பட்டதாக வெளியான தகவலையடுத்து டெல்லியில் போராட்டங்கள் வெடித்தன. அப்போது செய்தியாளர் ஒருவருக்கு பேட்டியளித்த அந்தப் பெண், தங்களுக்குப் பிரதமர் மோடி அனுமதி கொடுத்தால் தாங்களே நேராக ஈரான் சென்று அமெரிக்க முன்னாள் அதிபர் டிரம்ப் மற்றும் இஸ்ரேல் பிரதமர் நெதன்யாகு ஆகியோரை ஒழித்துக்கட்டுவோம் என்று ஆவேசமாக முழக்கமிட்டார்.
தனது சமூகத்தினர் நீண்டகாலமாகப் போராட்டங்களைச் சந்தித்து வருவதாகக் கூறிய அந்தப் பெண், யாருக்கும் அஞ்சமாட்டேன் என்றும் கேமரா முன்னால் அதிரடியாகப் பேசினார். இந்தப் போராட்டத்தைத் தொடர்ந்து ஜந்தர் மந்தர் மற்றும் சீலம்பூர் பகுதிகளில் பாதுகாப்பு பலப்படுத்தப்பட்டது. அகில இந்திய ஷியா கவுன்சில் உறுப்பினர்கள் திரண்டு கருப்பு உடை அணிந்து தங்கள் துக்கத்தைப் பதிவு செய்தனர். “அமெரிக்கா ஒழிக”, “நெதன்யாகு ஒழிக” போன்ற ஆக்ரோஷமான முழக்கங்களால் டெல்லியின் போராட்டக்களம் பெரும் பரபரப்புடன் காணப்பட்டது.
