தமிழக வெற்றிக் கழகத்தின் தலைவர் விஜய், கட்சியின் பொதுக்கூட்டங்கள், பிரசார நிகழ்வுகள் மற்றும் மக்கள் சந்திப்புகளுக்கான பாதுகாப்புத் திட்டமிடலை பலப்படுத்த ஒரு முக்கிய முடிவை எடுத்துள்ளார். இதன் ஒரு பகுதியாக, காவல் துறையில் ஓய்வுபெற்ற உயர் அதிகாரிகளைக் கொண்ட ஒரு சிறப்புக் குழுவை உருவாக்க அவர் திட்டமிட்டுள்ளதாகத் தகவல்கள் வெளியாகியுள்ளன. இந்தக் குழுவில், முன்னாள் உளவுத்துறை (IB) இயக்குநர், காவல்துறை தலைமை இயக்குநர் (DGP), கூடுதல் காவல்துறை தலைமை இயக்குநர் (ADGP) உள்ளிட்ட சுமார் 15 உயர் அதிகாரிகள் இடம்பெறுவார்கள் என்று கூறப்படுகிறது.

இந்த அனுபவம் வாய்ந்த அதிகாரிகள் குழுவானது, கட்சியின் முக்கிய நிகழ்வுகளுக்கான முழுமையான பாதுகாப்பு வியூகங்களை வகுக்கும் பணியில் ஈடுபட உள்ளது. அத்துடன், கட்சியின் தொண்டர் அணிகளுக்கு ஒழுங்குமுறை மற்றும் அவசர காலங்களில் செயல்படுவது தொடர்பான பயிற்சிகள் மற்றும் ஆலோசனைகளையும் இந்தக் குழு வழங்கும். இந்த நடவடிக்கை, கட்சியின் பொது நிகழ்வுகளைச் சீராகவும், பாதுகாப்பாகவும் நடத்துவதற்கு உதவும் என்றும், களப்பணியாற்றும் தொண்டர் படைக்குத் தேவையான நிபுணத்துவ வழிகாட்டுதல் கிடைக்கும் என்றும் எதிர்பார்க்கப்படுகிறது.