தமிழக சட்டப்பேரவையில் இன்று நடைபெற்ற விவாதத்தின்போது, திமுக முன்னாள் அமைச்சரும், தற்போதைய தவெக பள்ளிக்கல்வித்துறை அமைச்சருமான ராஜமோகன் இடையேயான காரசாரமான விவாதம் பெரும் பரபரப்பை ஏற்படுத்தியுள்ளது. இந்த மோதல் தொடர்பான வீடியோ தற்போது இணையத்தில் வெளியாகி வைரலாகி வருகிறது.
சட்டப்பேரவையில் இன்று பேசிய திமுக மூத்த தலைவரும் முன்னாள் அமைச்சருமான எ.வ.வேலு, “இந்தச் சட்டமன்றத்தில் தற்போது இருக்கின்ற மேஜைகள், மைக்குகள் மற்றும் அனைத்து வசதிகளும் திராவிட மாடல் ஆட்சியில் செய்யப்பட்டவை. அப்போது பொதுப்பணித்துறை அமைச்சராக இருந்த நான்தான், இவை அனைத்தையும் என் சொந்தப் பொறுப்பில் பார்த்து பார்த்துச் செய்தேன்” என்று மிகவும் பெருமையுடன் பேசினார்.
எ.வ.வேலுவின் இந்தப் பேச்சைக் கேட்டதும், ஆளுங்கட்சியான தமிழக வெற்றிக் கழகத்தின் (தவெக) பள்ளிக்கல்வித்துறை அமைச்சர் ராஜமோகன் உடனடியாக எழுந்து தக்க பதிலடி கொடுத்தார். “இங்கு இருக்கின்ற மேஜைகள், மைக்குகள் என அனைத்தும் மக்கள் கட்டிய வரிப்பணத்தில் தான் செய்யப்பட்டதே தவிர, வேறு யாருடைய சொந்தப் பணத்திலும் செய்யப்படவில்லை” என்று மிகக் காட்டமாகப் பதிலளித்தார்.
திமுக முன்னாள் அமைச்சர் மார்தட்டிப் பேசியதற்கு, தவெக அமைச்சர் ராஜமோகன் எந்தவிதத் தயக்கமும் இன்றி ‘மக்கள் வரிப்பணம்’ என முகத்தில் அடித்தாற்போல் கொடுத்த இந்த அதிரடிப் பதிலடி, சட்டப்பேரவையில் பெரும் சலசலப்பை ஏற்படுத்தியது.
சட்டப்பேரவையில் அரங்கேறிய இந்தச் சுவாரஸ்யமான மற்றும் அனல் பறக்கும் விவாதத்தின் காணொளி தற்போது சமூக வலைதளங்களில் தீயாகப் பரவி வருகிறது. தவெக அமைச்சரின் இந்தத் துணிச்சலான பதிலடியைப் பார்த்த நெட்டிசன்கள், அந்த வீடியோவை அதிகளவில் பகிர்ந்து தங்களது கருத்துக்களைத் தீவிரமாகப் பதிவு செய்து வருகின்றனர்.
