அமெரிக்காவில் பெண் மாவட்ட நீதிபதி ஒருவர், மூத்த போலீஸ் அதிகாரி ஒருவருடன் நீதிமன்றத்தின் ரகசிய அறையிலேயே வேலை நேரத்தில் பாலியல் உறவு உள்ளிட்ட ஒழுங்கீன செயல்களில் ஈடுபட்டதாக எழுந்த புகாரை அடுத்து, அவர் மீது கூட்டாட்சி நீதித்துறை குழு (Federal Judicial Panel) கடுமையான ஒழுங்கு நடவடிக்கை எடுத்துள்ளது. சுமார் இரண்டு ஆண்டுகளாக நீடித்த இந்த கள்ளக்காதல் விவகாரம், நீதிமன்ற ஊழியர்கள் மற்றும் சட்ட எழுத்தர்களுக்கு பெரும் அசௌகரியத்தையும், சங்கடமான பணிச்சூழலையும் ஏற்படுத்தியதாகத் தலைமை நீதிபதி வில்லியம் பிரையரிடம் அதிகாரப்பூர்வமாகப் புகார் அளிக்கப்பட்டது.

ஆரம்பத்தில் இந்தத் தவற்றைக் கடுமையாக மறுத்த அந்த நீதிபதி மீது, ஏழு நீதிபதிகள் கொண்ட சிறப்புக் குழு நடத்திய தீவிர விசாரணையில் குற்றச்சாட்டுகள் அனைத்தும் உண்மை என்பது ஆதாரங்களுடன் நிரூபிக்கப்பட்டுள்ளது. விசாரணைக் குழுவின் அறிக்கையின்படி, அந்த நீதிபதி நீதிமன்ற வளாகத்திற்குள் ஒழுங்கீனமாக நடந்துகொண்டது மட்டுமன்றி, ஆரம்பக்கட்ட விசாரணையின் போது மூத்த நீதித்துறை அதிகாரிகளிடம் பொய் வாக்குமூலம் அளித்ததும், விதிகளை மீறி உள்ளூர் மாவட்ட வழக்கறிஞர் தேர்தல் பிரச்சாரத்தில் பங்கேற்றதும் கண்டறியப்பட்டுள்ளது.

இந்த விவகாரத்தால் அந்த நீதிபதிக்கு ஏதேனும் மிரட்டல்களோ அல்லது அச்சுறுத்தல்களோ ஏற்பட வாய்ப்புள்ளதாகக் குழு கவலை தெரிவித்துள்ளது. தற்பொழுது, அந்த நீதிபதியின் பெயர் பொதுவெளியில் அறிவிக்கப்படாத போதிலும், அவர் இனி எக்காலத்திலும் கூட்டாட்சி நீதிமன்றத்தின் தலைமை நீதிபதியாகப் பொறுப்பேற்கக் கூடாது என்றும், நீதிமன்றக் குழுக்களில் பங்கேற்கக் கூடாது என்றும் வாழ்நாள் தடை விதிக்கப்பட்டுள்ளது. மேலும், இதனால் பாதிக்கப்பட்ட ஆறு சட்ட எழுத்தர்களிடம் அவர் முறைப்படி மன்னிப்புக் கடிதம் வழங்க வேண்டும் என்றும் உத்தரவிடப்பட்டுள்ளது.