சென்னை உயர்நீதிமன்றத்தில் இளம் பெண் வக்கீல் ஒருவர் தாக்கல் செய்த மனுவில், “கல்லூரி காலத்தில் காதலித்த நபருடன் இருந்த அந்தரங்க வீடியோ இணையதளங்களில் பரவுகிறது.

கடந்த மாதம் மத்திய அரசுக்கு மனு அளித்தும் எந்த நடவடிக்கையும் எடுக்கப்படவில்லை” என தெரிவித்திருந்தார். இந்த வழக்கை விசாரித்த நீதிபதி என். ஆனந்த் வெங்கடேஷ், கண்கலங்கிய நிலையில், மத்திய அரசுக்கு 48 மணி நேரத்துக்குள் அனைத்து இணையதளங்களிலும் இருந்து அந்த வீடியோக்களை அகற்றக் கடுமையான உத்தரவு பிறப்பித்தார்.

மேலும், பெண் வக்கீல் தொடர்பான வீடியோ மற்றும் புகைப்படங்கள் 70 இணையதளங்களில் பரவியுள்ளதைக் குறிப்பிடும் நிலையில், அந்த இணையதளங்களை முடக்க மத்திய அரசுக்கு உத்தரவிடப்பட்டது. இதையடுத்து வழக்கின் மறுவிசாரணை கடந்த 15ஆம் தேதி நடந்தது. அப்போது மத்திய அரசு, இணையதளங்களை முடக்கும் பணியில் நடவடிக்கைகள் எடுக்கப்பட்டுள்ளதாக அறிவித்தது. ஆனால் இன்னும் 39 இணையதளங்களில் வீடியோக்கள் பரவுவதால் அதனைத் தடுக்க தீவிர நடவடிக்கைகள் தேவைப்படுவதாக மனுதாரர் தரப்பில் வலியுறுத்தப்பட்டது.

மேலும், குற்றச்சாட்டுக்குள்ளான வீடியோவை 7 காவல்துறையினருடன் இணைந்து அந்த பெண்ணின் முன்னிலையில் காண்பித்ததற்காக, நீதிபதி கடும் கண்டனம் தெரிவித்தார். இது, ஏற்கனவே மன உளைச்சலில் இருக்கும் அந்த பெண்ணுக்கு மேலும் வேதனை ஏற்படுத்தியுள்ளதாக அவர் வலியுறுத்தினார். இவ்வாறு விசாரணை நடத்தும்போது, பெண் காவல்துறை அதிகாரிகளை மட்டும் ஈடுபடுத்த வேண்டும் என்றும், பாதிக்கப்பட்டவரின் பெயரை முதல் தகவல் அறிக்கையிலிருந்து உடனடியாக நீக்க காவல்துறைக்கு கட்டளையிட்டார்.

இந்த வழக்கில் பாதிக்கப்பட்ட பெண் வழக்கறிஞரின் உரிமைகள் பாதுகாக்கப்பட வேண்டும் என்பதோடு, இனி இதுபோன்ற வழக்குகளில் மாநில தலைமை குற்றவியல் வழக்கறிஞர் நேரடியாக நீதிமன்றத்துக்கு உதவ வேண்டும் எனவும் நீதிபதி ஆலோசனை வழங்கியுள்ளார். இவ்வழக்கின் தொடர்ந்த விசாரணை வரும் ஜூலை 22ஆம் தேதிக்கு ஒத்திவைக்கப்பட்டுள்ளது.