சமூக வலைதளங்களின் பயன்பாடு நாளுக்கு நாள் அதிகரித்து வரும் நிலையில், அதன் தாக்கம் குடும்ப உறவுகளிலும் எதிரொலிக்கத் தொடங்கியுள்ளது. குறிப்பாக காதல், திருமணம் மற்றும் கணவன்-மனைவி உறவுகள் தொடர்பான காணொளிகள், பதிவுகள் மற்றும் கருத்துகளை தொடர்ந்து பார்ப்பது சிலரிடம் தேவையற்ற எதிர்பார்ப்புகளையும் சந்தேகங்களையும் உருவாக்குவதாகக் கூறப்படுகிறது.

சமூக வலைதளங்களில் பிரபலமாகும் ‘ரெட் ஃபிளாக்’ போன்ற கருத்துகள், ஒரு உறவில் இருக்கும் சிறிய பிரச்சினைகளைக்கூட பெரிய எச்சரிக்கை அறிகுறியாக பார்க்கும் மனநிலையை சிலரிடம் ஏற்படுத்தலாம். துணையின் ஒரு சாதாரண நடவடிக்கையைக்கூட இணையத்தில் பார்த்த தகவல்களுடன் ஒப்பிட்டு சந்தேகப்படத் தொடங்கும்போது, உறவில் நம்பிக்கை குறைய வாய்ப்பு உள்ளது.

அதேபோல், சமூக வலைதளங்களில் மற்றவர்களின் வாழ்க்கையை தொடர்ந்து பார்ப்பதும் பிரச்சினையை ஏற்படுத்தலாம். இணையத்தில் அழகாகவும் மகிழ்ச்சியாகவும் காட்டப்படும் குடும்ப வாழ்க்கையை நிஜ வாழ்க்கையுடன் ஒப்பிடும்போது, ‘என் வாழ்க்கை மட்டும் ஏன் இப்படியில்லை?’ என்ற மனநிலை உருவாகக்கூடும். இதனால் துணை மீது அதிருப்தி அதிகரித்து, தேவையற்ற வாக்குவாதங்களும் ஏற்படலாம்.

சமூக வலைதளங்களை முழுமையாகத் தவிர்ப்பது மட்டுமே தீர்வு அல்ல. அவற்றைப் பயன்படுத்தும் அளவைக் கட்டுப்படுத்துவதுடன், இணையத்தில் பார்க்கும் ஒவ்வொரு கருத்தையும் உண்மை அல்லது பொதுவான விதி என்று எடுத்துக்கொள்ளாமல் இருப்பது முக்கியம். உறவில் சந்தேகம் அல்லது பிரச்சினை ஏற்பட்டால், சமூக வலைதளப் பதிவுகளை அடிப்படையாகக் கொண்டு முடிவு எடுப்பதற்குப் பதிலாக நேரடியாக பேசிக் கொள்வதும், தேவையானபோது நிபுணரின் ஆலோசனையைப் பெறுவதும் உறவை பாதுகாக்க உதவும்