நவி மும்பையின் முக்கிய தொழிற்பேட்டை பகுதியான மஹேப்பில், மக்களின் அன்றாட தேவையான பாலில் அபாயகரமான முறையில் கலப்படம் செய்து விற்பனை செய்து வந்த ஒரு மிகப்பெரிய கும்பலை உணவு மற்றும் மருந்து நிர்வாக அதிகாரிகள் அதிரடியாகக் கண்டுபிடித்துள்ளனர்.
அதிகாலையில் பொதுமக்கள் விழிப்பதற்கு முன்பே, மிக ரகசியமான முறையில் இயங்கி வந்த இந்த போலி பால் நெட்வொர்க்கை எஃப்.டி.ஏ அதிகாரிகள் மற்றும் உள்ளூர் காவல்துறையினர் இணைந்து நடத்திய திடீர் சோதனையின் மூலம் தகர்த்தெறிந்துள்ளனர்.
இந்த கும்பல், சந்தையில் புகழ்பெற்ற பிராண்டட் நிறுவனங்களின் அசல் பால் பாக்கெட்டுகளை வாங்கி, அதில் உள்ள பாலைப் பாதியாகப் பிரித்து, அதற்குப் பதிலாக ஆபத்தான வேதிப்பொருட்கள், சுத்திகரிக்கப்படாத சுத்தமற்ற தண்ணீர் மற்றும் கெமிக்கல்களைக் கலந்து பாக்கெட்டுகளை மீண்டும் அதிநவீன இயந்திரங்கள் மூலம் ரீ-சீல் செய்து வந்துள்ளனர்.
மேலும் பார்க்க அசல் பாக்கெட் போலவே காட்சி அளிக்கும் வகையில் இந்தத் தில்லுமுல்லு வேலைகளைச் செய்து, நாள்தோறும் ஆயிரக்கணக்கான லிட்டர் போலி பாலை பொதுமக்கள் மற்றும் உள்ளூர் கடைகளுக்கு விநியோகம் செய்து லாபம் ஈட்டியது சோதனையில் அம்பலமாகியுள்ளது.
சம்பவ இடத்தில் தீவிர சோதனை நடத்திய அதிகாரிகள், பல ஆயிரம் லிட்டர் கலப்பட பால், பாக்கெட்டுகளை சீல் வைக்கும் இயந்திரங்கள், போலி கவர் பாக்கெட்டுகள் மற்றும் கலப்படத்திற்குப் பயன்படுத்தப்பட்ட கெமிக்கல்களை மொத்தமாகப் பறிமுதல் செய்தனர்.
மக்கள் மற்றும் குறிப்பாகக் குழந்தைகளின் ஆரோக்கியத்துடன் விளையாடும் இதுபோன்ற சமூக விரோத செயல்களில் ஈடுபட்டவர்கள் மீது கடுமையான பிரிவுகளின் கீழ் வழக்குப் பதிவு செய்யப்பட்டுள்ளது. காலை உணவில் தவிர்க்க முடியாத பாலில் இதுபோன்று கொடூரமான முறையில் கலப்படம் செய்யப்பட்டது நவி மும்பை நுகர்வோர்கள் மத்தியில் பெரும் அதிர்ச்சியையும் அச்சத்தையும் ஏற்படுத்தியுள்ளது.
