திமுக கூட்டணியில் அதிருப்தி ஏற்பட்டுள்ளதாக வெளியான செய்திகளை முற்றிலும் பொய்யானவை என மறுத்து, திராவிட இயக்கத்தின் தொடர்ச்சிக்காக தங்களது கூட்டணி உறுதியாக இருப்பதாக மதிமுக கட்சியின் பொதுச்செயலாளர் வைகோ கூறியுள்ளார். திமுகவின் உயர்நிலை குழு மற்றும் பொதுக்குழுக் கூட்டங்களில் தங்களது முடிவுகளை உறுதியாக எடுத்துள்ளனர் என்றும், “நான் கடைசியாக பேசும்போது, அந்த கூட்டத்தில் 15 நிமிடங்கள் முழுவதும் திராவிட மாடல் அரசின் முக்கியத்துவத்தைப் பற்றித்தான் பேசினேன்; அங்கே இருந்த அனைவரும் கைதட்டி வரவேற்றனர்” என அவர் தெரிவித்தார்.
மேலும், 2026 சட்டமன்ற தேர்தலில் திமுக மிகப்பெரிய பெரும்பான்மையுடன் மீண்டும் ஆட்சிக்கு வரும் என வைகோ நம்பிக்கை தெரிவித்துள்ளார். “தளபதி ஸ்டாலின் தலைமையில் திராவிட மாடல் அரசு தொடர வேண்டும் என்பதே எங்களது இலட்சியம். கூட்டணி ஆட்சி வரும் என்பதற்கே இடமில்லாமல் இருக்கப் போகிறது. மக்கள் அது போன்று விரும்ப மாட்டார்கள். அந்த மாபெரும் வெற்றிக்கு உறுதுணையாக இருப்பதற்காகத்தான் திராவிட இயக்கத்தை காக்கும் முயற்சியில் நாங்கள் இருக்கிறோம்” என தைரியமாக தெரிவித்தார்.
பாஜகவின் திட்டங்களை கடுமையாக விமர்சித்த வைகோ “இந்துத்துவா சக்திகள், சனாதன சக்திகள் தமிழ்நாட்டை கைப்பற்ற நினைக்கின்றன. அமித் ஷா, மோடி உள்ளிட்ட பாஜக தலைவர்கள் இங்கு பஞ்சாயத்து செய்ய நினைக்கிறார்கள். ஆனால் அவர்கள் முயற்சிகள் முழுமையாக தோல்வியடையப்போகின்றன. இது பெரியார், அண்ணா, கலைஞர் ஆகியோரின் பூமி. இந்த பூமியில் திராவிட இயக்கத்தின் வேர்கள் துளைத்து ஊன்றியிருக்கின்றன. எனவே, திராவிட இயக்கம் எனது நாடி நரம்பாகவே உள்ளது” என்றார்.
திமுகவில் தனது வரலாற்றுப் பின்னணியையும் அவர் கூறினார். “1964 ஆகஸ்ட் 21 அன்று பேரறிஞர் அண்ணா முன்னிலையில் கோக்கலை ஹாலில் பேசினேன். அப்போது திமுகவில் இணைந்தேன். இந்திய எதிர்ப்பு போராட்ட களத்தில் நான் இருந்தவன். சட்டத்தையே மீறி எரித்தவன். நாடாளுமன்றத்தில் இந்தியா தொடர்பான எதிர்ப்பு தீர்மானங்களை நிறைவேற்ற முயன்றவன். வாஜ்பாய் தலைமையிலான தேசிய ஜனநாயக கூட்டணியில் இருந்த போதும், ஒரே மதம், ஒரே மொழி, ஒரே நாடு போன்ற ஒற்றுமைப்படுத்தும் எண்ணங்களை ஒழிந்த வண்ணமே ‘நேஷனல் அஜெண்டா’ தயாரிக்கப்பட்டது. அதில் எனக்கும் முரசொலி மாரனுக்கும் கையெழுத்து இருக்கிறது” என்று கூறிய வைகோ, திமுக மற்றும் திராவிட இயக்கத்தின் அரசியல் உறுதிப்பாட்டை மீண்டும் வலியுறுத்தியுள்ளார்.
