மும்பை வித்யாபிகார் பகுதியில் உள்ள ஸ்டேஷன் சாலையில், மாநகராட்சி சார்பில் சாலை விரிவாக்கம் மற்றும் கட்டட இடிப்புப் பணிகள் தீவிரமாக நடைபெற்று வந்தன. அப்பகுதியில் ஜேசிபி இயந்திரத்தைப் பயன்படுத்தி ஒரு கடை இடிக்கப்பட்டுக்கொண்டிருந்தபோது, அங்கு எந்தவிதமான முறையான பாதசாரி பாதுகாப்பு நடவடிக்கைகளும் மேற்கொள்ளப்படவில்லை என்று கூறப்படுகிறது.  இதற்கிடையே, எஸ்கே சோமையா கல்லூரியில் முதல் ஆண்டு பிகாம் பயின்று வரும் 17 வயது மாணவன் தேவன் ஜெயின் மற்றும் அவரது உறவினர் பிராத்தம் ஜெயின் ஆகியோர் கல்லூரியை முடித்துவிட்டு வீடு திரும்பிக் கொண்டிருந்தனர்.

அந்தக் கடை இடிக்கப்பட்டுகொண்டிருந்த இடத்தைக் கடந்து அவர்கள் சென்றுகொண்டிருந்தபோது, எதிர்பாராதவிதமாக அங்கிருந்த இரும்பு சி-சேனல்  ஒன்று திடீரென கழன்று ஓடைப் பகுதிக்குத் தாவி வந்து அந்த மாணவனின் வலது கண்ணுக்கு மேலே பலமாகத் தாக்கியது. இந்த எதிர்பாராத கோரத் தாக்குதலில் நிலைதடுமாறிச் சரிந்து படுகாயமடைந்த அந்த இளம் மாணவனை அப்பகுதி மக்கள் உடனடியாக மீட்டு சிகிச்சைக்காக ராஜவாடி மருத்துவமனைக்கு விரைந்து கொண்டு சேர்த்தனர். அங்கு அவருக்குத் தீவிர மருத்துவச் சிகிச்சைகள் அளிக்கப்பட்டு வருவதாகவும், அவரது உடல்நிலை தொடர்ந்து கண்காணிக்கப்பட்டு வருவதாகவும் தகவல்கள் வெளியாகியுள்ளன.

இந்தச் சம்பவம் குறித்துத் தகவல் அறிந்த தவன் ஜெயினின் தந்தையான வினோத் பீம்ராவ் ஜெயின் திலக் நகர் காவல் நிலையத்தில் அளித்த புகாரின் அடிப்படையில், அலட்சியமாக இயந்திரத்தை இயக்கி விபத்தை ஏற்படுத்திய ஜேசிபி ஓட்டுநர் 25 வயது மெஹ்தாப் மெஹ்தி ஹசன் மீது காவல்துறையினர் வழக்குப்பதிவு செய்துள்ளனர். முதற்கட்ட விசாரணையில், எவ்விதப் பாதுகாப்பு முன்னெச்சரிக்கை ஏற்பாடுகளும் செய்யப்படாமல் இந்த இடிப்புப் பணிகள் நடத்தப்பட்டதே இந்த விபத்திற்குக் காரணம் என்பது தெரியவந்துள்ள நிலையில், இதுதொடர்பாகப் போலீசார் தீவிர விசாரணையை மேற்கொண்டு வருகின்றனர்.