திருப்பூர் மாவட்டம் அவிநாசி அருகே கைக்காட்டிபுதூர் ஜெயம் கார்டனைச் சேர்ந்தவர் கவின்குமார் (29). இவரது மனைவி ரிதன்யா (27) கடந்த ஜூன் 28ம் தேதி மொண்டிபாளையம் அருகே ஒரு காரில் விஷம் குடித்து தற்கொலை செய்து கொண்டார். அவரது தற்கொலைக்கு முன்னதாக வாட்ஸ் அப் மூலம் அனுப்பிய ஆடியோ பதிவு ஒன்றில், தற்கொலைக்குத் தூண்டியவர்கள் குறித்த தகவல்கள் வெளிவந்ததால், அதனைத் தொடர்ந்து போலீசார் வழக்குப் பதிவு செய்தனர்.

இந்த ஆடியோவை அடிப்படையாகக் கொண்டு போலீசார் ரிதன்யாவின் கணவர் கவின்குமார் மற்றும் அவரது மாமனார் ஈஸ்வர மூர்த்தி ஆகியோரை கைது செய்து சிறையில் அடைத்தனர். மாமியார் சித்ரா தேவியும் நேற்று முன்தினம் கைது செய்யப்பட்டார். இதனையடுத்து, சித்ரா தேவியை மருத்துவ பரிசோதனைக்காக திருப்பூர் அரசு மருத்துவக் கல்லூரி மருத்துவமனைக்கு போலீசார் அழைத்துச் சென்றனர்.

அப்போது சித்ரா தேவியின் உறவுக்காரப் பெண் ஒருவர், அவருடன் ஒத்த உருவ அமைப்புடன் மருத்துவமனையில் வந்திருந்தார். சித்ரா தேவியின் அருகிலேயே நின்ற அந்த பெண், உடலமைப்பிலும் ஒரே மாதிரி இருந்ததால், பத்திரிகையாளர்கள் மற்றும் பொதுமக்கள் யார் உண்மையான சித்ரா தேவி என்பது தெரியாமல் குழப்பமடைந்தனர். இந்த காட்சி சமூக வலைதளங்களில் பதிவு செய்யப்பட்டு, பரவலாக பகிரப்பட்டு வருகிறது.

இந்த சம்பவம் தொடர்பாக காவல்துறையினர் கூறுகையில், “தற்கொலை வழக்கு தொடர்பாக அனைத்து முக்கிய சாட்சிகளையும் சேகரித்து விசாரணை நடைபெற்று வருகிறது. சித்ரா தேவிக்கு எதிரான குற்றச்சாட்டு உறுதி செய்யப்படுவதற்கான ஆதாரங்களைப் பார்த்த பிறகே வழக்கு வலுப்படுத்தப்படும்” என தெரிவித்தனர்.

இந்நிலையில், மருத்துவமனையில் ஏற்பட்ட உருவக் குழப்பம், பொதுமக்களிடையே சிந்தனையை ஏற்படுத்தியுள்ளது. இது போல தடைகளை தவிர்க்கும் வகையில் கைதிகளின் அடையாளங்கள் உறுதிப்படுத்தப்பட வேண்டும் என்ற கோரிக்கையும் எழுந்துள்ளது.