சுதந்திர தினமான ஆகஸ்ட் 15-ஆம் தேதி, இலங்கை மண்ணில் உள்ள புகழ்பெற்ற காலி  சர்வதேச கிரிக்கெட் மைதானத்தில் இந்தியா மற்றும் இலங்கை அணிகளுக்கு இடையேயான முதல் டெஸ்ட் போட்டி கோலாகலமாகத் தொடங்கவுள்ளது. இந்த வரலாற்றுச் சிறப்புமிக்க தொடரை வெல்ல கில்  படை தீவிரமாகக் களம் இறங்கி வருகிறது.

போட்டிக்கு இன்னும் சில நாட்களே உள்ள நிலையில், கொழும்புவில் உள்ள என்.சி.சி. மைதானத்தில் இந்திய அணி தீவிர பயிற்சியில் ஈடுபட்டுள்ளது. கடந்த திங்கட்கிழமை நடைபெற்ற இந்த ஆப்ஷனல் பயிற்சி அமர்வில், வேகப்பந்து வீச்சாளர்கள் முகமது சிராஜ், பிரசித் கிருஷ்ணா மற்றும் குர்னூர் ப்ரார் ஆகியோருக்கு மட்டும் ஓய்வு அளிக்கப்பட்டது. மற்றபடி ஒட்டுமொத்த இந்திய அணியும் களமிறங்கி வியூகங்களை வகுத்தது.

குறிப்பாக, காலி மைதானத்தின் பிட்ச் எப்படி இருக்கும் என்பது கிரிக்கெட் ரசிகர்களுக்குத் தெரிந்ததே. அங்கு சுழற்பந்து வீச்சாளர்களின் ஆதிக்கமும், பந்து வேகமாகப் பழையதாகி ‘ரிவர்ஸ் ஸ்விங்’  ஆவதும் வழக்கம். இந்தச் சுழல் மற்றும் ஸ்விங் வலையில் சிக்காமல் தப்பிக்க, இந்திய அணி நிர்வாகம் ஒரு மாஸ்டர் பிளான் போட்டது. அதற்காக மைதானத்தின் க்யூரேட்டர்களிடம் ஒரு சிறப்பு ஏற்பாட்டைச் செய்தனர்.

முன்னதாக மூன்று நாள் வார்ம்-அப் போட்டி நடைபெற்ற அதே பிட்ச்சில்தான் இந்திய அணி பயிற்சியை மேற்கொண்டது. அந்தப் பிட்ச் பார்ப்பதற்கு சரியாக நான்காம் நாள் டெஸ்ட் பிட்ச் போல மாற்றப்பட்டிருந்தது; அதாவது பிட்ச் முழுவதும் ஏராளமான விரிசல்களுடன் காட்சியளித்தது. இந்தச் சவாலான பிட்ச்சில் ரவீந்திர ஜடேஜா, குல்தீப் யாதவ், மானவ் சுதார மற்றும் சாராஷ் ஜெயின் போன்ற முன்னணி இந்திய சுழற்பந்து வீச்சாளர்களுக்கு எதிராக நமது பேட்டர்கள் தங்கள் கால்களை நகர்த்தி விளையாடும் முறையைத் தீவிரமாகப் பயிற்சி செய்தனர்.

விரல் காயத்தில் இருந்து முழுமையாக மீண்டு வந்துள்ள கேப்டன் சுப்மன் கில், நேரடியாக நெட்ஸ்க்குச் சென்று ரகசியப் பயிற்சியில் ஈடுபட்டார். த்ரோ-டவுன் ஸ்பெஷலிஸ்ட்களிடம், குறிப்பாகப் பழைய மற்றும் பாதி சேதமடைந்த கூக்காபுரா பந்துகளை மட்டுமே வீசச் சொல்லி, ரிவர்ஸ் ஸ்விங் தாக்குதலைச் சமாளிக்கும் நுணுக்கங்களைக் கற்றார். சுமார் 20 நிமிடங்கள் இந்தத் த்ரோ-டவுன் பயிற்சியை முடித்த கில், நேராக சென்டர் விக்கெட்டுக்குச் சென்று ஜம்மு-காஷ்மீர் வேகப்பந்து வீச்சாளர் அகிப் நபி வீசிய பழைய பந்து வீச்சுகளையும் எதிர்கொண்டு தன் திறமையை மெருகேற்றினார்.

இலங்கையின் சொரசொரப்பான ஆடுகளங்களில் பந்தின் மினுமினுப்பு வெகுவிரைவாக மறைந்துவிடும் என்பதால், அங்கு ரிவர்ஸ் ஸ்விங் மிகத் சீக்கிரமாகவே கிடைக்கத் தொடங்கும். இந்த ஆபத்தான சவாலைத் திறம்பட எதிர்கொள்ளவே, இந்திய அணி தங்களது பயணத்தின் போது பலவிதமான பழைய மற்றும் புதிய கூக்காபுரா பந்துகளைத் பிரத்யேகமாக உடன் எடுத்துச் சென்றுள்ளது. எப்படிப்பட்ட சூழலையும் சமாளித்து முதல் டெஸ்டில் வெற்றி கொடியை நாட்ட இந்திய அணி முழு வீச்சில் தயாராகி வருகிறது!