பிரான்ஸ் நாட்டின் தலைநகர் பாரிஸில், கடந்த சில நாட்களாக நிலவி வந்த கடுமையான வெப்ப அலைக்கு முற்றுப்புள்ளி வைக்கும் விதமாக, இடி, மின்னல் மற்றும் சூறாவளிக் காற்றுடன் கூடிய கனமழை வெளுத்து வாங்கியது. இந்தத் திடீர் வானிலை மாற்றத்தின் போது, பாரிஸ் நகரின் உலகப் புகழ்பெற்ற அடையாளமான 330 மீட்டர் உயரமுள்ள ஈஃபில் கோபுரத்தின்  உச்சியில், மிக மிக வீரியம் மிக்க பிரம்மாண்ட மின்னல் ஒன்று நேரடியாகப் பாய்ந்து தாக்கியது. காரிருள் சூழ்ந்த வானத்தில், கோபுரத்தின் மீது மின்னல் பாய்ந்த அந்த ஒரு நொடியில் ஒட்டுமொத்த பாரிஸ் நகரமே பேரொளியால் பிரகாசித்தது.

ఈఫిల్ టవర్‌పై పిడుగు కాంతి అద్భుతం.

ఆకాశంలో అద్భుతమైన కాంతులతో పారిస్ మెరిసిపోయింది.#Paris #Wonder #EffileTower #viral pic.twitter.com/i9EFKgmjm0

— Madhuri Daksha (@MadhuriDaksha) June 28, 2026

இயற்கையின் இந்த அரிய மற்றும் வியப்பூட்டும் விசித்திரக் காட்சி அங்கிருந்த கேமராவில் மிகத் துல்லியமாகப் பதிவு செய்யப்பட்டு, தற்போது சமூக வலைத்தளங்களில் உலக அளவில் காட்டுத்தீயாகப் பரவி இணையவாசிகளை உலுக்கி வருகிறது. மின்னல் தாக்கிய இந்த வீடியோவைப் பார்த்த பலரும் அதிர்ச்சியடைந்ததோடு, கோபுரத்தின் பாதுகாப்பு குறித்துக் கவலை தெரிவித்தனர். ஆனால், இந்த மின்னல் தாக்கத்தால் ஈஃபில் கோபுரத்தின் எந்தவொரு பகுதிக்கும் எவ்வித சேதமும் ஏற்படவில்லை என்று அந்நாட்டு அதிகாரிகள் மற்றும் அறிவியல் நிபுணர்கள் விளக்கம் அளித்துள்ளனர்.

இயற்பியலாளர் மைக்கேல் ஃபாரடேயின் தத்துவப்படி, மின்சாரத்தைக் கடத்தும் பிரம்மாண்ட இரும்பு அமைப்பைக் கொண்ட இந்த கோபுரம் ஒரு பாதுகாப்புக் கூண்டாகச்  செயல்படுகிறது. இதன் காரணமாக, மின்னல் தாக்கும்போது ஏற்படும் பல்லாயிரக்கணக்கான வோல்ட் மின்சாரம், கோபுரத்தின் வழியே பயணித்து பூமிக்குள் பாதுகாப்பாக இறக்கப்பட்டுவிடும். ஈஃபில் கோபுரத்தின் உச்சியில் ஆண்டுக்குச் சராசரியாக 5 முதல் 10 முறை வரை மின்னல் தாக்குவது வழக்கமான ஒன்றுதான் என்றாலும், கடுமையான வெப்பத்தைத் தணித்த இந்த கோடைக்காலப் புயலில் பதிவான இந்த மின்னல் காட்சி, காண்போரை மெய்சிலிர்க்க வைக்கும் மிக அரிய வானிலை அதிசயமாக மாறியுள்ளது.