ராஜஸ்தான் மாநிலம் டங்கர்பூர் மாவட்டத்தில் உள்ள பிச்சிவாரா காவல் நிலையத்திற்கு முதியவர் ஒருவர் மிக முக்கியமான புகார் ஒன்றை அளிப்பதற்காகச் சென்றுள்ளார். அங்கு பணியில் இருந்த ரீனா கார்க் என்ற பெண் போலீஸ் கான்ஸ்டபிள், அந்த முதியவரின் புகாரை வாங்குவதற்கோ அல்லது அதற்கு முறையான நடவடிக்கை எடுப்பதற்கோ எவ்வித விருப்பமும் இல்லாமல் மிகவும் அலட்சியமாக இருந்துள்ளார். அதுமட்டுமன்றி, வயது முதிர்ந்தவர் என்றும் பாராமல், அவமரியாதை செய்யும் நோக்கில் தனது இரண்டு கால்களையும் டேபிளின் மீது தூக்கிப் போட்டுக்கொண்டு மிகவும் திமிராக அமர்ந்து அராஜகம் செய்துள்ளார்.
பொதுமக்களுக்குச் சேவை செய்ய வேண்டிய காவல்துறை அதிகாரி ஒருவரின் இந்த அநாகரிகமான மற்றும் பொறுப்பற்ற செயலை, அங்கிருந்த யாரோ ஒருவர் ரகசியமாகத் தனது மொபைல் போனில் புகைப்படம் எடுத்து சமூக வலைத்தளங்களில் பதிவிட்டுள்ளார். இந்தத் திமிர்பிடித்த பெண் போலீஸின் புகைப்படம் இணையத்தில் காட்டுத்தீயாய் பரவி மக்கள் மத்தியில் கடும் கொந்தளிப்பை ஏற்படுத்தியதைத் தொடர்ந்து, ராஜஸ்தான் மாநில காவல்துறை உடனடியாகக் களத்தில் இறங்கியது.
டங்கர்பூர் மாவட்ட எஸ்பி மணீஷ் குமார் இந்தச் சம்பவத்திற்கு அதிரடியாக நடவடிக்கை எடுத்து, அந்தப் பெண் போலீஸை சஸ்பெண்ட் செய்து உத்தரவிட்டுள்ளார். சமூக வலைத்தளங்களின் மாபெரும் சக்தியால், தவறு செய்யும் அரசு அதிகாரிகள் தப்பவே முடியாது என்பது இந்தச் சம்பவத்தின் மூலம் மீண்டும் நிரூபிக்கப்பட்டுள்ளது.
