தமிழகத்தில் வரும் 2026 சட்டமன்றத் தேர்தலை முன்னிட்டு, “மக்களைக் காப்போம், தமிழகத்தை மீட்போம்” என்ற முழக்கத்துடன் அ.தி.மு.க. பொதுச்செயலாளர் எடப்பாடி பழனிசாமி தீவிரப் பிரச்சாரம் மேற்கொண்டு வருகிறார். செங்கல்பட்டு மாவட்டம் திருப்போரூரில் நடைபெற்ற மக்கள் சந்திப்பு நிகழ்ச்சியில் பேசிய அவர், தி.மு.க. அரசு தனது தேர்தல் வாக்குறுதிகளில் வெறும் 5 சதவீதத்தை மட்டுமே நிறைவேற்றியுள்ளதாகக் குற்றம் சாட்டினார்.

அ.தி.மு.க. ஆட்சிக் காலத்தில் 95 சதவீத வாக்குறுதிகள் நிறைவேற்றப்பட்டதைச் சுட்டிக்காட்டிய அவர், தி.மு.க. ஆட்சி முடிய இன்னும் மூன்று அமாவாசை நாட்களே உள்ளதாகக் குறிப்பிட்டார். மேலும், பொங்கல் பண்டிகையை முன்னிட்டு குடும்ப அட்டைதாரர்களுக்கு தலா 5,000 ரூபாய் வழங்க வேண்டும் என்றும் அவர் தமிழக அரசுக்குக் கோரிக்கை விடுத்தார்.

அதிமுக மீண்டும் ஆட்சிக்கு வந்தால், பெண்களுக்கான திருமண உதவித் தொகை 50,000 ரூபாயாக உயர்த்தப்படும் என்றும், 100 நாள் வேலைத் திட்டம் 150 நாட்களாக அதிகரிக்கப்படும் என்றும் எடப்பாடி பழனிசாமி புதிய வாக்குறுதிகளை அளித்தார்.

செங்கல்பட்டு, கள்ளக்குறிச்சி போன்ற புதிய மாவட்டங்களை உருவாக்கியது அ.தி.மு.க. அரசு தான் என்பதை நினைவு கூர்ந்த அவர், திருப்போரூர் எப்போதும் அ.தி.மு.க.வின் கோட்டையாகத் திகழும் என்று பெருமிதத்துடன் தெரிவித்தார்.

2026-ல் மீண்டும் அ.தி.மு.க. ஆட்சி அமையத் தொண்டர்கள் அனைவரும் ஒற்றுமையுடன் உழைக்க வேண்டும் என்றும் அவர் இந்தப் பொதுக்கூட்டத்தில் வேண்டுகோள் விடுத்தார்.