பெண்கள் குறித்து அவதூறாகவும் ஆபாசமாகவும் பதிவிட்டதாகவும், அமைச்சர் கீர்த்தனாவின் ‘AI’ புகைப்படங்களை வெளியிட்டதாகவும் கூறப்பட்ட புகாரின் பேரில், பிரபல யூடியூபர் மாரிதாஸை சென்னை சைபர் கிரைம் போலீசார் அதிரடியாகக் கைது செய்துள்ள விவகாரம் தமிழக அரசியலில் பெரும் புயலைக் கிளப்பியுள்ளது.

தவெக (தமிழக வெற்றிக் கழகம்) அரசின் இந்த அதிரடி நடவடிக்கைக்கு நாம் தமிழர் கட்சியின் தலைமை ஒருங்கிணைப்பாளர் சீமான் மிகக் கடுமையான கண்டனத்தைத் தெரிவித்துள்ளார்.

மாரிதாஸ் கைது செய்யப்பட்டிருப்பது அப்பட்டமான அரசியல் பழிவாங்கும் நடவடிக்கை என்று சாடியுள்ள சீமான், அண்மைக்காலமாக முதலமைச்சர் விஜய் மற்றும் தவெக அமைச்சர்கள், நிர்வாகிகள் மீது மாரிதாஸ் தொடர்ந்து விமர்சனங்களையும் குற்றச்சாட்டுகளையும் முன்வைத்து வந்ததாலேயே, தற்பொழுது பழிவாங்கும் நோக்கில் இந்த ஆளுங்கட்சி அரசு இத்தகைய நடவடிக்கையை எடுத்துள்ளதாகக் குற்றம் சாட்டியுள்ளார்.

மக்களாட்சித் தத்துவத்தில் கருத்துச் சுதந்திரத்தின் குரல்வளையை நெரிக்கும் விதமாக அதிகார பலத்தைப் பயன்படுத்தி மாற்றுக் கருத்துடையவர்களை ஒடுக்குவது கண்டிக்கத்தக்கது என்றும் அவர் தனது அறிக்கையில் குறிப்பிட்டுள்ளார்.

தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ள இந்த மாரிதாஸ் கைது மற்றும் அதற்கு ஆதரவாகவும் எதிர்த்தும் கிளம்பியுள்ள அரசியல் தலைவர்களின் காரசாரமான அறிக்கைகள், தற்பொழுது சமூக வலைத்தளங்களில் நெட்டிசன்கள் மத்தியில் மிகப்பெரிய அளவில் விவாதிக்கப்பட்டு இணையத்தில்  ட்ரெண்டாகி வருகிறது.