நாடு முழுவதும் பெரும் அதிர்வலைகளை ஏற்படுத்திய நீட் தேர்வு வினாத்தாள் கசிவு விவகாரம் அரசியல் களத்தில் மிகப்பெரிய பூகம்பத்தையே உருவாக்கியுள்ளது. இந்த விவகாரத்தில் முழுப்பொறுப்பேற்று மத்திய கல்வி அமைச்சர் தர்மேந்திர பிரதான் தனது பதவியை உடனடியாக ராஜினாமா செய்ய வேண்டும் என்பதை வலியுறுத்தி ‘கரப்பான்பூச்சி ஜனதா கட்சி’ சார்பில் டெல்லி ஜந்தர் மந்தரில் தீவிரமான போராட்டம் முன்னெடுக்கப்பட்டது. இந்த அறவழிப் போராட்டம் திசைமாறி மாணவர்களும், இளைஞர்களும் திரண்ட மாபெரும் போராட்டமாக வெடித்தது.

கடந்த 20-ந்தேதி டெல்லியில் நாடாளுமன்றத்தை முற்றுகையிட முயன்ற மாணவர்களின் பேரணியைத் தடுத்து நிறுத்தக் காவல்துறையினர் நடத்திய கடுமையான தடியடி மற்றும் கண்ணீர் புகைக்குண்டுகள் வீச்சு நாடே அதிரும் அளவுக்குச் சம்பவங்களை அரங்கேற்றின. இதில் ஏராளமான மாணவர்கள் படுகாயமடைய, மாணவர்களுக்கு ஆதரவான குரல்கள் நாடு முழுவதும் எதிரொலிக்கத் தொடங்கின. இந்தச் சூழலில் தான் மாணவர்களின் கடும் எதிர்ப்புக்குப் பணிந்து, மத்திய கல்வி அமைச்சர் தர்மேந்திர பிரதான் தனது அமைச்சர் பதவியை ராஜினாமா செய்துள்ளார்.

மாணவர்களின் எழுச்சி காரணமாகத் தன் பதவியை இழந்துள்ள தர்மேந்திர பிரதான், ஒடிசா மாநிலத்தின் மிக மூத்த மற்றும் பலம் வாய்ந்த அரசியல் தலைவர்களில் ஒருவராக அறியப்படுகிறார். தனது கல்லூரிப் பருவத்திலிருந்தே ஏபிவிபி (ABVP) அமைப்பின் தீவிரச் செயல்பாட்டாளராகத் தன்னை இணைத்துக் கொண்ட அவர், 1993-ல் அதன் மாநிலச் செயலாளராகவும், 1995-ல் தேசியப் பொதுச் செயலாளராகவும் உயர்ந்தார்.

முறையாக 2000-ஆம் ஆண்டில் அரசியலில் காலடி எடுத்துவைத்த அவர், ஒடிசா சட்டமன்றத் தேர்தலில் போட்டியிட்டு வெற்றி பெற்று 2000 முதல் 2004 வரை எம்.எல்.ஏ.-வாகப் பணியாற்றினார். அந்தச் காலகட்டத்திலேயே பாஜக இளைஞரணித் தலைவராகவும் (2001), தேசியச் செயலாளராகவும் (2002) அசுர வளர்ச்சி கண்டார். அதுமட்டுமின்றி, ஒடிசா சட்டமன்றத்தின் சிறந்த சட்டமன்ற உறுப்பினருக்கான மதிப்புமிக்க ‘உத்கல்மணி கோபபந்து பிரதிபா சம்மான்’ விருதும் இவருக்கு வழங்கிச் சிறப்பிக்கப்பட்டுள்ளது குறிப்பிடத்தக்கது.

தொடர்ந்து தேசிய அரசியலில் கவனம் செலுத்திய தர்மேந்திர பிரதான், 2004-ஆம் ஆண்டு நடைபெற்ற 14-வது மக்களவைத் தேர்தலில் போட்டியிட்டு முதன்முறையாக எம்.பி. ஆனார். அதே ஆண்டில் பாஜக யுவ மோர்ச்சா  தேசியத் தலைவராகவும் நியமிக்கப்பட்டார். நாடாளுமன்றத்தில் பல்வேறு பொறுப்புகளை வகித்த இவர், மனுக்கள் மீதான குழு, எரிசக்தி துறைக்கான நிலைக்குழு (2007), அரசு உறுதிமொழிகள் குழு (2012-2014) மற்றும் தொலைத்தொடர்பு உரிமங்கள் மற்றும் அலைக்கற்றை ஒதுக்கீடு தொடர்பான கூட்டு நாடாளுமன்றக் குழு  ஆகியவற்றில் மிக முக்கிய உறுப்பினராகத் திறம்படப் பணியாற்றியுள்ளார். ஏப்ரல் 2012 முதல் 2018 வரை மாநிலங்களவை உறுப்பினராகவும், பின்னர் ஜூன் 2024-ல் நடைபெற்ற 18-வது மக்களவைத் தேர்தலில் வெற்றி பெற்று மீண்டும் நாடாளுமன்றத்திற்குத் தேர்ந்தெடுக்கப்பட்டார்.

மத்திய அமைச்சரவையில் பல ஆண்டுகளாக மிகவும் செல்வாக்கு மிக்க துறைகளைக் கையாண்டு வந்தவர் தர்மேந்திர பிரதான். செப்டம்பர் 2017-ல் பெட்ரோலியம் மற்றும் இயற்கை எரிவாயுத்துறை மற்றும் திறன் மேம்பாட்டுத்துறை அமைச்சராகவும், மே 2019 முதல் எஃகு துறை அமைச்சராகவும் பொறுப்புகளை வகித்துள்ளார். இவரது அரசியல் வாழ்க்கையில் மிக முக்கியமான திருப்புமுனையாக அமைந்தது ஜூலை 7, 2021 அன்று இவருக்கு வழங்கப்பட்ட கல்வித்துறை அமைச்சர் பதவிதான்.

அதன் தொடர்ச்சியாக, ஜூன் 2024-ல் 18-வது மக்களவைக்குத் தேர்ந்தெடுக்கப்பட்டதை அடுத்து, மீண்டும் ஜூன் 9, 2024 அன்று மத்தியக் கல்வித்துறை அமைச்சராகப் பொறுப்பேற்றார். ஆனால், தற்போது நாடு முழுவதும் உள்ள மாணவர்களின் கொந்தளிப்பான நீட் தேர்வு வினாத்தாள் கசிவுப் போராட்டம் இவரது ஒட்டுமொத்த அரசியல் வாழ்க்கையையும் உலுக்கிவிட்டுள்ளது என்பது குறிப்பிடத்தக்கது.