திமுக கூட்டணியில் தொகுதிப் பங்கீடு மற்றும் அமைச்சரவை விவகாரங்கள் தொடர்பாகக் கடுமையான அரசியல் புகைச்சல் கிளம்பியுள்ள நிலையில், திமுக அமைப்புச் செயலாளர் ஆர்.எஸ்.பாரதி செய்தியாளர்களிடம் பேசிய அதிரடியான கருத்துக்கள் தமிழக அரசியலில் பெரும் புயலைக் கிளப்பியுள்ளது.
ஏற்கனவே திமுக அமைச்சரவையில் இடம் பெற்றுவிட்டு, தற்போது அதையே ஒரு காரணமாகக் காட்டி ஐயூஎம்எல் (இந்திய யூனியன் முஸ்லிம் லீக்) கட்சி தங்களின் கூட்டணியை விட்டு வெளியேறியுள்ளதைச் சுட்டிக்காட்டிய அவர், இதே பாணியைத்தான் மதிமுகவும் பின்பற்றப் போகிறது என ஓப்பனாகக் குற்றம் சாட்டியுள்ளார்.
அதாவது, கூட்டணியில் இருந்து கம்பி நீட்டுவதற்காக வைகோவின் மதிமுக கட்சியும் இதே போன்றதொரு காரணத்தைத் தேடி, ஐயூஎம்எல் வழியிலேயே வெளியேறக் காத்துக் கொண்டிருக்கிறது என்பதை ஆர்.எஸ்.பாரதி தனது பேச்சில் போட்டு உடைத்துள்ளார்.
மேலும், அகில இந்திய அளவில் ராகுல் காந்தி தங்களின் கூட்டணிக்கு அழைப்பு விடுக்கத்தான் செய்வார் என்றும், ஆனால் தமிழ்நாட்டில் யார் கூட்டணியில் இருக்க வேண்டும், யாருக்கு இடம் கொடுக்க வேண்டும் என்பது குறித்து இறுதியாகத் திமுக தலைமைதான் தீர்க்கமான முடிவை எடுக்கும் என்றும் அவர் மிக கறாராகத் தெரிவித்துள்ளார்.
ஆர்.எஸ்.பாரதியின் இந்த அதிரடி “ஸ்கெட்ச்” அரசியல் வட்டாரத்தில், குறிப்பாக மதிமுக மற்றும் கூட்டணிக் கட்சிகள் மத்தியில் பெரும் அதிர்வலைகளையும் விவாதங்களையும் கிளப்பியுள்ளது.
