நேபாள நாட்டில் ஏற்பட்ட திடீர் பெருவெள்ளம் மற்றும் நிலச்சரிவில் சிக்கித் தவித்த இந்திய யாத்திரிகர்களில், முதற்கட்டமாக மீட்கப்பட்ட 21 தமிழர்கள் சிறப்பு விமானம் மூலம் பாதுகாப்பாக டெல்லி வந்தடைந்துள்ளனர். காத்மண்டுவில் இருந்து புறப்பட்ட அவர்கள் டெல்லி வந்தடைந்த நிலையில், இன்று (ஆகஸ்ட் 28) இரவு 8 மணி அளவில் டெல்லியில் இருந்து விமானம் மூலம் சென்னை திரும்புகின்றனர்.

​கும்பகோணம் உள்ளிட்ட தமிழகத்தின் பல்வேறு பகுதிகளில் இருந்து கைலாஷ் யாத்திரைக்குச் சென்று நேபாள வெள்ளத்தில் சிக்கிய 57 பேரில், முதற்கட்டமாக இந்த 21 பேர் பத்திரமாக மீட்கப்பட்டுத் தாயகம் அழைத்து வரப்பட்டுள்ளனர். மீதமுள்ளவர்களையும், நேபாளத்தில் தவிக்கும் மற்ற தமிழ்நாட்டு மக்களையும் விரைவாகக் கண்டறிந்து மீட்கும் பணிகளைத் தமிழக அரசு மிகத் தீவிரமாக முடுக்கிவிட்டுள்ளது.

​தமிழ்நாடு முதலமைச்சர் அவர்களின் உத்தரவின் பேரில், பொதுப்பணித்துறை அமைச்சர் ஆதவ் அர்ஜூனா, பள்ளிக்கல்வித்துறை அமைச்சர் ராஜ்மோகன், வேளாண்மைத் துறை அமைச்சர் வினோத் மற்றும் அயலகத் தமிழர் நலத்துறை அமைச்சர் தென்னரசு ஆகியோர் டெல்லியில் முகாமிட்டுள்ளனர். டெல்லி தமிழ்நாடு இல்லத்தில் அமைக்கப்பட்டுள்ள 24 மணி நேர உதவி மையக் கட்டுப்பாட்டு அறையில் இருந்து, மத்திய வெளியுறவுத்துறை அமைச்சகம் மற்றும் நேபாள தூதரக அதிகாரிகளுடன் அமைச்சர்கள் தொடர் ஆலோசனையில் ஈடுபட்டு மீட்பு நடவடிக்கைகளை நேரடியாகக் கண்காணித்து வருகின்றனர்.

​பாதிக்கப்பட்ட எஞ்சிய தமிழர்களையும் பத்திரமாக மீட்டுத் தமிழகம் அழைத்து வரும் வரை அனைத்து கட்ட உதவிகளும் தடையின்றி வழங்கப்படும் என அரசு தரப்பில் உறுதியளிக்கப்பட்டுள்ளது. முதற்கட்டமாக 21 பேர் டெல்லி வந்து சேர்ந்த தகவல், தங்களின் உறவினர்களை எண்ணிக் கவலையில் ஆழ்ந்திருந்த குடும்பத்தினரிடையே மாபெரும் நிம்மதியையும் மகிழ்ச்சியையும் ஏற்படுத்தியுள்ளது.