அதிமுக கூட்டணியிலிருந்து அதிரடியாக வெளியேறிய புதிய தமிழகம் கட்சித் தலைவர் டாக்டர் கிருஷ்ணசாமி, தற்போது எடப்பாடி பழனிசாமி மீது கடுமையான விமர்சனங்களை முன்வைத்துள்ளார். “தென் தமிழ்நாட்டில் உள்ள 50 முதல் 60 தொகுதிகளில் அதிமுக தற்போது மிகவும் பலவீனமாக உள்ளது; அங்கே அவர்களால் டெபாசிட் கூட பெற முடியாது” என அவர் கூறியிருப்பது அரசியல் களத்தில் பெரும் அதிர்வலைகளை ஏற்படுத்தியுள்ளது.

தங்களுக்கு உரிய மரியாதையை அதிமுக தலைமை வழங்கவில்லை என்பதே இந்த விரிசலுக்கு முக்கியக் காரணம் என அவர் சுட்டிக்காட்டியுள்ளார். மேலும், எடப்பாடி பழனிசாமியைச் சாடிய அவர், “மத்திய உள்துறை அமைச்சர் அமித்ஷா தன்னை முதலமைச்சர் ஆக்கிவிடுவார் என நினைத்துக்கொண்டு, எடப்பாடி பழனிசாமி மற்ற கூட்டணிக் கட்சிகளை அலட்சியப்படுத்துகிறார்” என பகிரங்கமாகக் குற்றம் சாட்டியுள்ளார்.

அதிமுகவின் பலம் தென் மாவட்டங்களில் சரிந்துவிட்டதாகக் கூறும் கிருஷ்ணசாமி, தங்களை உதாசீனம் செய்ததற்கு அதிமுக வரும் தேர்தலில் மிகப்பெரிய விலையைக் கொடுக்க வேண்டியிருக்கும் எனவும் எச்சரித்துள்ளார். தொகுதிப் பங்கீட்டில் ஏற்பட்ட இழுபறி, இப்போது அதிமுகவின் வெற்றி வாய்ப்பையே கேள்விக்குறியாக்கும் அளவுக்கு ஒரு பெரிய அரசியல் யுத்தமாக மாறியுள்ளது.