அமெரிக்கா மற்றும் ஈரான் நாடுகளுக்கு இடையே சுவிட்சர்லாந்தின் ஜெனிவாவில் வரலாற்று முக்கியத்துவம் வாய்ந்த ஒரு இடைக்கால ஒப்பந்தம் கையெழுத்தாக உள்ளது.

பாகிஸ்தானின் மத்தியஸ்தத்துடன் உருவாகும் இந்த ‘இஸ்லாமாபாத் ஒப்பந்தம்’, போரைத் தவிர்த்தல், ஹோர்முஸ் ஜலசந்தியை மீண்டும் பொது போக்குவரத்திற்குத் திறந்துவிடுதல் மற்றும் ஈரான் அணு ஆயுதங்களைத் தயாரிக்க மாட்டோம் என உறுதியளித்தல் போன்ற முக்கிய அம்சங்களைக் கொண்டுள்ளது.

இந்த ஒப்பந்தம் கையெழுத்தான 60 நாட்களுக்குள் லெபனான் உள்ளிட்ட அனைத்து எல்லைகளிலும் போர் நிறுத்தம் அமலுக்கு வரும் என்றும், ஈரானின் துறைமுகங்கள் மீதான அமெரிக்காவின் தடைகள் நீக்கப்பட்டு, தேஹ்ரானுக்குப் பொருளாதாரச் சலுகைகள் வழங்கப்படும் என்றும் தகவல்கள் தெரிவிக்கின்றன.

இந்த ஒப்பந்தம் குறித்த அதிகாரப்பூர்வமான உறுதிப்படுத்தலை ஈரான் இன்னும் வெளியிடவில்லை என்றாலும், அமெரிக்க அதிபர் டொனால்ட் ட்ரம்ப் இதனை ஒரு முக்கிய மைல்கல்லாகக் கருதுகிறார்.

ஒப்பந்தம் கையெழுத்தான பிறகு, அமைதியான அணுசக்தித் திட்டம், தடைகளை முழுமையாக நீக்குதல் மற்றும் போரினால் ஏற்பட்ட இழப்புகளுக்கு ஈடு செய்தல் போன்ற எஞ்சிய மூன்று முக்கிய விவகாரங்கள் குறித்து இரு நாடுகளும் விரிவான பேச்சுவார்த்தைகளை நடத்தும்.

இந்த ஒப்பந்தம் பிராந்திய அமைதிக்கு ஒரு புதிய தொடக்கமாக அமையும் என்று எதிர்பார்க்கப்படும் நிலையில், அமெரிக்காவின் துணை அதிபர் ஜே.டி. வான்ஸ் இதற்கான கையெழுத்து விழாவில் பங்கேற்க வாய்ப்புள்ளதாகத் தெரிகிறது.