மகாராஷ்டிர மாநிலம் மும்பை அருகேயுள்ள அம்பர்நாத் ரயில் நிலையத்தில், மாற்றுத்திறனாளி நபர் ஒருவர் தனது உயிரைப் பணயம் வைத்து ரயில் தண்டவாளத்தைக் கடக்க முயன்ற பதறவைக்கும் வீடியோ காட்சி இணையத்தில் வெளியாகி, ரயில்வே நிர்வாகத்தின் கட்டமைப்பு மற்றும் பயணிகள் பாதுகாப்பு குறித்த பெரும் விவாதத்தைக் கிளப்பியுள்ளது.

சக்கர நாற்காலி அல்லது மாற்றுத்திறனாளிகளுக்கான சிறப்பு வசதிகள் சரியாகப் பராமரிக்கப்படாத சூழலில், வேறு வழியின்றி அந்த நபர் ஆபத்தான முறையில் தண்டவாளத்தில் இறங்கி அடுத்த நடைமேடைக்குச் செல்ல முற்பட்ட காட்சி காண்போரின் நெஞ்சைப் பதற வைத்துள்ளது.

அம்பர்நாத் போன்ற அதிக கூட்ட நெரிசல் மிகுந்த புறநகர் ரயில் நிலையங்களில், மாற்றுத்திறனாளிகள் மற்றும் முதியவர்கள் எளிதாக நடைமேடைகளைக் கடந்து செல்ல ஏதுவாக நகரும் படிக்கட்டுகள் அல்லது மின்தூக்கிகள் போன்ற வசதிகள் முறையாகச் செயல்படாமல் இருப்பது தொடர்கதையாகி வருகிறது.

இதன் காரணமாகவே, மாற்றுத்திறனாளிகள் தங்களின் அன்றாடப் பயணங்களின் போது நடைமேடைப் பாலங்களைப் பயன்படுத்த முடியாமல், ஆபத்தை உணர்ந்தும் தண்டவாளங்களில் இறங்கிச் செல்லும் நிலைக்குத் தள்ளப்படுகின்றனர்.

இந்தச் சம்பவத்திலும், அந்த நபர் மிக அருகில் ரயில் வரக்கூடும் என்ற அச்சத்தையும் மீறித் தண்டவாளத்தைக் கடக்க முற்பட்டது அங்கிருந்த சக பயணிகளை அதிர்ச்சியில் ஆழ்த்தியது. இந்த விடியோ சமூக வலைத்தளங்களில் வைரலாகப் பரவியதைத் தொடர்ந்து, ரயில்வே நிர்வாகத்தின் அலட்சியப் போக்கிற்கு எதிராக நெட்டிசன்களும் பயணியர் நல அமைப்புகளும் கடுமையான கண்டனங்களைப் பதிவு செய்து வருகின்றனர்.

நாட்டின் நிதித் தலைநகரின் புறநகர்ப் பகுதிகளில் தினமும் லட்சக்கணக்கான மக்கள் ரயில்களை நம்பியிருக்கும் சூழலில், மாற்றுத்திறனாளிகளுக்கான அடிப்படை உள்கட்டமைப்பு வசதிகளை உடனடியாக மேம்படுத்த வேண்டும் என்றும், பழுதடைந்துள்ள மின்தூக்கிகளைச் சீரமைக்க வேண்டும் என்றும் கோரிக்கைகள் வலுத்து வருகின்றன. பயணிகள் தங்களின் உயிரைப் பணயம் வைக்கும் நிலைக்குத் தள்ளப்படுவதற்கு முன்பாக, ரயில்வே துறை இதில் விரைந்து நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.

“>