அதிமுகவின் அசைக்க முடியாத சக்தியாகவும், ஐந்து முறை சட்டமன்ற உறுப்பினராகவும், எட்டு ஆண்டுகள் அமைச்சராகவும் இருந்த சி.விஜயபாஸ்கர், தனது எம்.எல்.ஏ பதவியையும் கட்சியையும் திடீரென ராஜினாமா செய்திருப்பது தமிழக அரசியலில் பெரும் அதிர்வலைகளை ஏற்படுத்தியுள்ளது.

மருத்துவப் படிக்கும்போதே ஜெயலலிதாவின் மீது ஈர்ப்பு கொண்டு அதிமுகவில் இணைந்த அவர், கடந்த 25 ஆண்டுகளாக அக்கட்சியின் முக்கியத் தூணாகத் திகழ்ந்தார்.

எனினும், கடந்த காலத் தேர்தல் முடிவுகளுக்குப் பிறகு கட்சித் தலைமையுடன் ஏற்பட்ட கருத்து வேறுபாடுகளால், தனது மாவட்டச் செயலாளர் பதவியை இழந்ததோடு, தற்போது கட்சியிலிருந்தும் வெளியேறியுள்ளார்.

விஜயபாஸ்கரின் அடுத்த கட்ட அரசியல் நகர்வு குறித்த எதிர்பார்ப்புகள் அதிகரித்துள்ள நிலையில், அவர் தமிழக வெற்றிக் கழகத்தில் இணைவதற்கே அதிக வாய்ப்புள்ளதாக அவருக்கு நெருக்கமானவர்கள் தெரிவிக்கின்றனர்.

நடிகர் விஜயுடன் அவருக்கு இருக்கும் நீண்டகால நெருக்கம் மற்றும் தவெக-வின் எதிர்கால வளர்ச்சி குறித்த அவரது கணிப்புகள் இதற்கு முக்கியக் காரணமாகக் கூறப்படுகிறது.

அதேசமயம், திமுக மற்றும் அண்ணாமலை தரப்பினரும் அவரைத் தங்கள் பக்கம் இழுக்கத் தீவிர பேச்சுவார்த்தைகளை நடத்தி வருவதால், அடுத்த இரண்டு நாட்களில் அவர் தனது அரசியல் முடிவை அறிவிப்பார் என்று எதிர்பார்க்கப்படுகிறது.