இந்திய கிரிக்கெட் அணியின் தலைமைத் தேர்வாளரான அஜித் அகர்கரின் பதவி குறித்து முக்கிய முடிவை இந்திய கிரிக்கெட் கட்டுப்பாட்டு வாரியம் எடுத்துள்ளது. மும்பையில் நடைபெற்ற ஆலோசனைக் கூட்டத்துக்குப் பிறகு, அஜித் அகர்கர் தொடர்ந்து தலைமைத் தேர்வாளராக செயல்படுவார் எனத் தெரிவிக்கப்பட்டுள்ளது. தேர்வுக்குழுவிலும் எந்த மாற்றமும் செய்யப்படாது எனக் கூறப்பட்டுள்ளது. இதனால் அஜித் அகர்கரை பதவியில் இருந்து நீக்கலாம் என்ற தகவல்களுக்கு முற்றுப்புள்ளி வைக்கப்பட்டுள்ளது. 2027 உலகக் கோப்பை வரை தற்போதைய தேர்வுக்குழுவே தொடரும் எனத் தெரிகிறது.

சமீபத்தில் அஜித் அகர்கர் தலைமைத் தேர்வாளர் பதவியில் இருந்து நீக்கப்படலாம் என்றும், முன்னாள் வீரர் விவிஎஸ் லட்சுமணுக்கு கூடுதல் பொறுப்பு வழங்கப்படலாம் என்றும் தகவல்கள் வெளியாகின. இந்த தகவல்கள் கிரிக்கெட் ரசிகர்கள் மத்தியில் பரபரப்பை ஏற்படுத்தின. ஆனால் அத்தகைய எந்த முடிவும் எடுக்கப்படவில்லை என்று பிசிசிஐ தரப்பில் விளக்கம் அளிக்கப்பட்டுள்ளது. இதனால் அஜித் அகர்கரின் பதவி தற்போது பாதுகாப்பாக இருப்பது உறுதியாகியுள்ளது.

அதேபோல் விவிஎஸ் லட்சுமணுக்கு கிரிக்கெட் இயக்குநர் போன்ற புதிய பதவி வழங்கப்பட உள்ளதாக வெளியான தகவலையும் பிசிசிஐ மறுத்துள்ளது. அவர் தற்போது வகித்து வரும் சிறந்த செயல்திறன் மையத்தின் தலைமைப் பொறுப்பிலேயே தொடர்ந்து செயல்படுவார் என பிசிசிஐ செயலாளர் தெரிவித்துள்ளார். எனவே தேர்வுக்குழுவிலும் நிர்வாக அமைப்பிலும் உடனடி மாற்றம் எதுவும் இருக்காது எனத் தெளிவுபடுத்தப்பட்டுள்ளது. இதன் மூலம் சமீப நாட்களாக நிலவி வந்த குழப்பத்துக்கும் முடிவு ஏற்பட்டுள்ளது.

இதனிடையே ரோஹித் சர்மாவின் ஒருநாள் கிரிக்கெட் எதிர்காலம் குறித்தும் பிசிசிஐ முக்கிய தகவலை வெளியிட்டுள்ளது. ரோஹித்தின் பேட்டிங் திறனை பிசிசிஐ செயலாளர் பாராட்டியுள்ள நிலையில், அவர் உடனடியாக ஒருநாள் போட்டிகளில் இருந்து ஓய்வு பெறும் திட்டத்தில் இல்லை எனக் கூறப்படுகிறது. இதனால் 2027 உலகக் கோப்பைக்கான இந்திய அணியில் ரோஹித் சர்மா இடம்பிடிக்கும் வாய்ப்பு தொடர்ந்து உள்ளது. அஜித் அகர்கர் தலைமையிலான தேர்வுக்குழுவும் ரோஹித்தின் எதிர்காலம் குறித்த முடிவுகளை தொடர்ந்து கவனித்து வர உள்ளது.